GABE PARTOGI NA TIGOR JALA NA SINTONG

GABE PARTOGI NA TIGOR JALA NA SINTONG
Evangelium 22 Juli 2018: 1 Raja 21:1-16


A. Patujolo
Sada turturian na gok arsak do ngolu ni raja Ahab tingki manggomgomi di Israel, lumobi ma pangalaho ni Izebel pardihutana. Ai godang masa na so uhum di harajaonna; ndang diulahon raja Ahab na tinonahon ni Debata, baliksa hasogiron, marsombusombu do raja Ahab di si Isebel na mangantoi ulaon ni harajaon di Israel. Sahat tu ulaon parsombaon pe gabe dipajongjong langgatan baal dohot angka naposo ni Baal na nitolopan istana. On ma naso taralusan ni natorop: targoar bangso ni Debata, alai marjongjongan angka sombaon ball (berhala) dohot angka langgatan pamelean na binaen ni si Izebel si jungkat roha i, dilelei jala dibunui angka panurirang jala tarmalitondi bangsoi tahe ala ni pangalaho ni partogi na so manghajongjonghon uhum dohot hasintongan

Tung asing do barita ni Raja Ahab, anggo pangantusian ni Israel ia raja ima naposo manang parhobas ni Debata  na ingkon unduk jala marsihohot mangoloi Debata. Mangulahon uhum dohot hasintongan, mangalinggomi jala mamboan bangsoi tu hadumaon. Alai ida ma anggo si Ahab tung dao do sian i jala dirajai si Izebel sisomba ganaganaan baal. Dipamate  si Izebel do marratus panurirang (1 Raj 18:4). Suang songoni nang di angka haputusan dohot angka na so uhum na binaen ni si Izebel. Ido umbahen na didok si Elia tu si Ahab, raja na parohon hinamago ni Israel (Pat 1 Raj 18:18)

B. Panurirang Elia Paingothon Raja Ahab

Bangkit do naposo ni Debata ima panurirang Elia mangalo raja Ahab dohot Izebel. Paboa Debata ni Israel,  Debata na mangolu, baliksa anggo ball dht paranganna sude debata tinopa ni tangan do i. Marhite paraloan na pinatupa ni Elia dht angka tanda halongangan na pinatupana paboa Debata ni Israel ima Debata na mangolu, Debata na paluahon bangsona jala na manghajongjonghon uhum dohot hasintongan. Dibuktihon  Elia doi marhite peristiwa na masa si dolok Karmel: anggo debata baal pinauli nintangan doi, ido umbahen naso dipangan pelean i. Alai idama anggo Debata ni Israel Debata na mangolu do marhite na dijalo Jahowa pelean ni si Elia (jaha 1 Raj 18:21-39). Angkup nii maruari do Elia paboa na so ro udan manang piga taon di Israel asa mananda Ahab di Jahowa. 1 Raja-raja 17:1 (TOBA)  "Dung i ro ma hata ni si Elia, halak Tisbi, sian halak paisolat di Gilead, mandok tu si Ahab: Songon sintongna mangolu Jahowa, Debata ni Israel, jala ahu marhalado di jolona, ndang jadi ro nambur manang udan, manang piga taon on, molo so jolo ahu mandokkon!"

Masa do haleon potir jala torop mate anturaparon jala marhinamago ala ni partogi na so mangoloi Jahowa. Jala dison do dipatuduhon huaso ni Jahowa tu naposoNa dohot tu angka na porsea.  Disarihon Debata do si Elia marhitenpidong si Gak jala dipatupa angka tanda halongangan.

Nunga songoninuhum ni Debata, ndang muba si Ahab, baliksa tahe halak metmet pe tong do dipogo ibana ima turiturian na masa tu si Nabot. Ima songon na taida di turpuk on na margoar "Porlak anggur nisi Nabot."  Jala marhite jamitaon sasintongna mangolu do Debata jala paruhum na sintong. Dibunu si Ahab dht Izebel do si Nabot jala dilaumhon artana; alai ida ma na tigor do Debata. Na masa tu si Nabot sahalak sian na metmet di Israel gabe marronirimas Debata na ingkon slmate sarat-saraton ni biang ibana dohot inantana si Izebel.

Nuaeng taputihi majolo angka impola ni jamita sian turpuk on

C. Solo ni roha ni Raja Ahab Porlak Angur ni si Nabot.

Ndang pola jolma na tarbarita anggo keluarga ni si Nabot on, sada sian sihatoropan, nampuna porlak anggur apala jolok tu istana ni raja Ahab. Ia porlak anggurnai ima teanteanan ni ompuna do. Jala on do sada sipasingot unang pis roha di halak tu angka na so mardihadiha. Ai pamogoon ni si Ahab di porlak anggur ni si Nabot paro uhum tu si Ahab.

Sada uhum do di halak Israel paboa molo adong arta teanteanan ni ompuna na so jadi gadison sipatepate manang taripar tangan i tu marga na asing (Im 25:23). Molo tung adong tarsosak jumolo do paandaron tu dongan tubu manang keluarga na solhot. Molo so adong na pasuanghon sian keluarga na solhot baru pe tu halak.
Tangkas doi diboto raja Ahab, na adong uhum taringot tu teantenan. Alai idama ala ni solo ni rohana gabe ndang manghuling be rohana di uhum dohot ugari naung dipahot Debata sian ompunasida. Angkup nii tung pangidoannai pe sasintongna ndang na mandasor ai so kebutuhan ni bangso bahenonna porlak anggur ni si Nabot i , holan porlak sayur-sayuran ni raja Ahab do. Hape molo di halak Israel molo porlak anggur  na marlapatan dalan ni ngoluna do. Hape raja Ahab holan naeng porlak sayurna do.

Marsihohot do si Nabot di uhum paboa naso jadi gadison teanteanan. Ndada langgus ni roha ni si Nabot manjua di pangidoan ni rajai, tung ala ni uhum dohot patik teanteanan i do.

D. Ahab: Raja na nirajaan ni harajaanna: (Penguasa yang dikuasai Isteri)

1 Raja-raja 21:8 (TOBA)  Dung i dibahen ma angka surat marhitehite goar ni si Ahab jala disahap marhitehite sahapna, jala ditongoshon angka surat i tu angka sintua dohot tu halak na raja di bagasan hutana, angka dongan sahuta ni si Nabot tahe.

Marsak si Ahab di panjuaon ni si Nabot; murhing bohina, ndang olo mangan jala sai dompak dorpi do dibereng.  Songon halak na margudompong ala so dioloi pangidoan manang songon dakdanak na mardandi ala so bolas pangidoanna. Di situasi na songoni ma pintor ro si Izebel mandok, manungkun arsak ni rohana. Dungi dipaboa si  Ahab ma na dijua si Nabot pangidoanna naeng maningkat porlak anggurnai gabe porlak sayurna.
Si Izebel sahalak na so mabiar mida Debata, naso umboto uhum taringot tu patik dohot parenta ni Debata. Didok ibana ma tusi Ahab:
1 Raja-raja 21:7 (TOBA)  Dung i didok si Izebel jolmana i ma mandok ibana: Atehe mangkajongjongkon harajaon di Israel do ho nuaeng? Hehe ho, jala pangan sagusaguon, jala pir tondim! Ahu pe mangalehon tu ho porlak anggur ni si Nabot, halak Jisreel.

Songon halak na pajolo gogo papudi uhum, dipangke si Izebel do huaso manindos na metmet. Huaso manang sahap harajaon dipangke laho mambuat porlak anggur ni si Nabot i. Molo tajaha do turpuk on dipatorang lengkap songon dia si Izebel merekayasa kasus. Gabe siparsala si Nabot na mangaleai Debata. Hombar tu uhum halak na mangaleai Debata ingkon mate danguron. Dibaen si Islzebel do tingting marhite surat sijahaon na nisahap ni rajai paboa naso uhum diula si Nabot, jala dipabangkit sitindangi parroha na jahat, manolon na so tutu, laos disi ma diuhum si Nabot mate didangguri.

Sahap harajaon dipangke laho mamunu halak na tigor roha. On ma sada naso uhum, partogi manindos jala mangagohon hosa ni masyarakatna.  Boi do marhuaso si Ahab diharajaonna, dipamate si Nabot jala dibuat ibana porlak anggur ni si Nabot i marhita huasona. Alai ida ma ndang mauhom boti Debata. Sahat do anggukangguk ni si Nabot tu si Debata. Diudut ni baritaon disuru Debata do naposona si Elia pasahathon uhum tu si Ahab dohot ripena i.

E. Debata Paruhum Na Sintong:
Ingkon mate si Ahab dohot Izebel didilati biang.

Molo tataringori topik ni minggu mandok: Gabe partogi na tigor jala sintong gabe jamita na paingothon do turpuk on, asa unang masa songon si Ahab partogi naso mangulahon lomo ni roha ni Debata. Sai diula do naso hinalomohon ni Debata, marsombusombu ibana di baal jala sai dipajingjing pardihutana si Izebel mangulahon nasa na jat.

Didok: "ndang batu na balga umbahen tartuktuk alai batu na metmet do". Molo boi marlomolomo si Ahab dohot ripena Izebel nasai laon, idama molo tung metmet pe rohanasida marnida si Nabot jala pis rohana, alai ala ni hasintongan dohot uhum dibaloshon Debata do na masa tu si Nabot. Pola ingkon mate sarat-sarat on ni biang si Ahab dohot ripena i.

Disuru Debata do Elia palumbahon uhum  Ahab dohot tu Izebel, jala dijumpangi panurirangi do Ibana. Ndang mabiar Elia,  tung dipasahat do uhum i tu si Ahab ala hasogiron na pinatupana. Molo tajaha udut ni barita on dipabotohon do paboa: mate haraton ni biang raja Ahab dohot ripena si Izebel. Angkup nii nasa posoposo nang bajar-bajar pinompar nisi Ahab ingkon rasiphonon  ni Debata boi tajaha di 1 Raja-raja 21:19, 21, 23. Aha naung niuarihon ni panurirang Elia ido masa dompak raja Ahab mate ibana tingki marporang mangalo halak Ram.

Sada uhuman do disi Ahab, ai ndang mate ibana songon kestaria, alai mate disaratsarat biang. Halak sipatujoloon na ingkon tarbarita hian alai gabe turiturian sisaritaan ni torop halak. Molo raja nian raja ma ngoluna jala suang songoni parmatena. Alai asing do na dapot si Ahab.

1 Raja-raja 22:37-38, 42 (TOBA)  Jadi mate ma rajai, jala tarboan tu Samaria, jala ditanom halak do rajai di Samaria. Hape andorang diburi halak huretai di lambung tobat Samaria ro angka biang mandilati mudarna, ro dohot angka boruboru sibabijalang maridi disi, hombar tu hata ni Jahowa naung nilumbahonna hian. Alai marumur tolupulu lima taon do si Josapat uju bangkit raja ibana, jala duapulu lima taon lelengna ibana mangarajai di Jerusalem. Ia goar ni inana, i ma si Azuba, boru ni si Silhi.

F. Panimpuli
Barita ni si Ahab dohot Inantai si Izebel, sada sejarah buruk (sejarah hitam) doi di harajaon Israel. Disurathon do baritana di Buku Nabadia asa unang masa be songon Ahab di harajaon Israel dht di ngolu ni na porsea. Ganup partogi naeng ma siulahon uhum dohot hasintongan, mangalinggomi masyarakat dohot patupa haduma on. Tusi do hita tarjou  asa gabe pasupasu hita tu angka na humaliangta. Alani i siputihanta do jamita na arga:

1. Molo dilehon Debata kesempatan matjabatan manang marhuaso, manang sada tanggung jawab isara ni pegawai, uluan ni organisasi manang si perusahaan : ramot jala jamot ma diulahon dohot denggan, bertanggung jawab jala jujur. Ai jabatan amang huaso i silehonlehon ni Debata doi, sotung adong na pansuasaehon ai marro ni rimas do Debata tu angka halak na mansuasaehon jabatan dohot huasona.

2. Porlu jamita on manirai ngolu ni ganup rumatangga. Dilehon Debata soripada di angka baoa bahen pengurupi, jala pangurupi bolon do soripada di parsondukna. Alai peranan ni parsonduk bolon unang gabe batu partuktuhan tu ulaon ni amantana jala sisurahan ni angka na torop. Ganup ma ama manjamothon i, sotung masa songon si Izebel on. Jala ganup angka ina mangulahon ulaonna hombar ru porsina be gabe pangurupi jala pasauthin ulaon ni angka ama. Nang pe di nadeba nunga godang dumenggan ulaon manang jambatan ni ina maradophon ama, alai ganup.ina naeng ma pangurupi di ama asa tulus ulaonna dohot denggan.

3. Unang pis roha di halak na metmet jala na gale, pajolo gogo dohot papudi uhum. Ai mangolu do Debata jala sitimbangi uhum di pargulmiton ni na masa di ngolunta. Tapasiding ma angka na so uhum, alai taulahon ma hasintongan. Naboi masa doi di tonga ni masyarakat, gabe marlobolomo nampuna huaso di huasona, lam tartindos angka na metmet jala na pogos. Idama ro do Tuhani mangurupi dongan na metmet jala naso mardihadiha manghatindanghon uhum dohot hasintongan jala mambaloshon naso uhum tu angka na pajolo gogo. Tahabiari ma Debata di sandik gulmit ni ngolu. Taulahon ma hasintongan dohot hatigoran.


Pdt Nekson M Simanjuntak, MTh
HKBP Ressort Depok