Turpuk : 2 Timoteus 4:1-5
SAHAT ULA TOHONANMI - TUNAIKANLAH TUGAS PELAYANANMU
Patujolo/Pendahuluan
Sude do ra hita umboto lagu: “Sahat Ula Tohonanmi”; sada ende pujian na tung mansai tabo begeon jala tung mansai uli isi ni syair na. Haroroan ni endeon ima sian panguhalan ni turpuk 2 Timoteus 4:5. Sada joujou tu sude angka na porsea asa mangulahon tohonanna. Adong dua ragam panjouon tu huria. Panjouon Hatopan (panggilan am; vocatio generalis), ima sude do ruas ni huria tarjou gabe sitindangi Kristus jala gabe Parbarita Nauli (Pat Ulaon 1:8; Markus 16:15; 1 Pet 2:9). Tarjou do naporsea gabe sitindangi Kristus marhite angka ulaonna na marragam i, jala marhite angka ulaon dohot professi ni angka ruas ni huria di portibion gabe lam rarat Harajaon ni Debata. Panjouon tu Partohonan (panggilan khusus, vocatio specialis), ima angka partohonan na manjalo ulaon tohonan sian huria, na mamelehon diri mangula di huria, mangaradoti ulaon hamalimon dohot sihobasi Hatai marhite huriaNa; di parsaoran, di ulaon parasinirohaon, sakrament dohot angka ulaon haparmahanon dohot lan na asing (Mat 16:19; 28:29, Joh 21:15-19).
Turpuk jamita on ima joujou tu ganup ruas ni huria dohot tu papartohonan asa mangulahon tohonanna hombar tu panjouon dohot parsuruon ni Debata na tu hita. Mangulahon tohonan i ingkon marharoroan doi sian roha parbagason naung manghilalahon pamilliton dohot panjouon ni Debata tu ganup hita angka parhalado ni Huria.
Memang, surat ni Apostel Paulus tu Timoteus dohot Titus dogoari doi “Surat Pastoral”, lapatanna: surat penggembalaan manang panogunoguon asa tau jala radot nasida mangulaon ulaon haparhaladoon na hombar tu Barita Nauli. Molo tajaha do 1 Timoteus gumodang do panorangion dohot apoapo ni Apostel Paulus mananda huria; patandahon angka ise do di huriai, angka ise parhobas disi jala angka dia na boisipatupaon tu nasida. Ai tung songon dia ma tutu
bahenon manghobasi ango so jolo tinanda do huria i. Dung tinanda baru pe di surat na paduahon on dipoda Paulus ma taringot tu hadirion ni angka pangula, karakter dohot pangalado na ingkon siradotan ni pangula.
Songon dia do tutu, asa sahat ulahononta tohonan na pinasahat ni Debata tu hita, taida ma jolo angka na boi pahembangonta sian jamita on:
1. Jamitahon Hata i: Di Tingki Na Une dohot Naso Une (BERITAKANLAH FIRMAN BAIK ATAU TIDAK BAIK WAKTUNYA)
Songon dia do na nidokna manjamitahon Hatai di tingki na une dohot na so une? Molo tajaha do konteks ni turpuk on, ima mangajari Timoteus asa margogo ibana mangadopi ruas ni huria. Songon dia ma ibana marjamita tu halak angka ahli filsafat? Songon dia ma ibana manjamitahon Hata i tu angka na mora manang tu na pogos? Songon dia ma ibana manjamitahon hata i tu angka na malas ni roha dohot mangadopi hamaolon di ngoluNa, tu angka na mabalu dohot angka na tarsosak di ngoluna? Sandok sitopoton jala sijamitahonon do hata i tu ruas ni huria, di ganup parhusoran ni tingki; nang pe di angka las ni roha, nang pe dibagasan habot ni roha. Ndang hlan di tingki dapotan las ni roha tarjou marjamita. Ai hata ni Debata na jinamitahon ni angka parjamita marhagogoon situtu do i di ngolu ni angka na porsea (Pat. Ulaon 20:32).
Ngolu ni apostel Paulus pe gabe sada tudosan do songon dia manjamitahon Hata i di ganup tingki: direncanahon ibana do marbarita nauli marhite Perjalanan PI sian Jerusalem sahat tu Asia na Metmet sahat tu Eropa. Ditangkup ibana di Penjara, gabe marjamita do Ibana tu angka donganna na di penjara, di siding pengadilan pe ibana gabe sada kesempatan na denggan do i diibana manghatindangkon Kristus, di na tardempar pe parau ni Ibana di sada pulo, tong gabe partingkian na denggan di Ibana manjamitahon Kristus.
Antong manjamitahon Hata i di tingki na une dohot na so une, na marlapatan doi sada joujou do tu sude na porsea di ganup parhusoran ni pardalanan ni ngoluna. Gabe jamita ma ngoluna, jala ngolunai gabe jamita tu angka na humaliang. Na maol do halak pinsangon di hasalaanna, na maol do halak jamitaan di tingki hatangkangonna, alai nang pe songoni ndang gabe so jamitahononhon hata i. Ido umbahen na didok: pinsang,podahon , apoi marhite lambas ni roha. Terjemahan “lambas ni roha”ima kesabaran”; berbarti sabar hita paimahon parbue ni hatai di roha ni angka na ruas na jinamitaan.
2. Marjamita ndada holan na tabo begeon alai na margurasa paubahon roha.
Marasing do “Marjamita” (sermon) sian ‘public speaking’ (oratoror) nang pe rap mengkomunikasikan pesan terhadap pendengar. Jamita ima pasahathon pesan sian hata ni Debata, asa diulahon halak hamubaon ni roha dohot mangulahon lomo ni roha ni Debata. Alai molo public speaking ima; menyampaikan pesan kepada pendengar asa dioloi jala diulahon na didok ni orator. Parjamita ima parhitean ni Debata doi pasahathon Tona ni Debata. Alanii pamusatan ni jamita ima Hata ni Debata. Alai pasahat tonai jotjot do dipangke halak asa boi mengkel, na pageokgeok pinggol asa tartait roha ni angka na umbegesa. Jamita ndada na pageokgeok pinggol manang na manait tu roha ni jolma tona ni jamita, alai na manait halak tu marhamubaon ni roha jala rade mangulahon lomo ni roha ni Debata.
Marhite poda parjamitaon na pinasahat ni Apostel Paulus tu si Timoteus on, ditonahon asa impola ni jamita ndada kepuasan pendengar (tabo ni roha ni halak na umbegesa), ala songon dia ma asa diantusi, diboto jala diulahon halak Hata ni Debata.
Di poda parjamitaon, sai diondolhon do paboa Tondi Parbadia do, na mangalehon gogo di angka Parjamita.
3. Benget manaon haporsuhon jala sahat ula tohonanmi. (SABAR MENGHADAPI KESUSAHAN DAN TUNAIKANLAH TUGAS PELAYANANMU)
Dipodahon turpuk on, tu hita ingkon benget manaon haporsuhon, ai dihorhon haporsuhoni do habengeton, hinorhon ni habengeton i do hatauon jala hinorhon ni hatauon i do panghirimon jala ndang murak hita binahen ni panghirimon i (Jaha Rom 5:3-5). Habengeton mansai porlu di ngolu ni parjamita ala marragam do angka tantangan siadopan ni angka parjamita; mulai sian na direhei, diinsahi, dipahatahata sahat tu na ditulak tahe. Sandok di sude i, unang pola mandele hita disi, mauliate ma molo diloas Debata do pe hita marjamita jala gabe parhalado ni huria. Mauliate ma molo tung torop dope ruas ni huria na rade tumangihon hataNa; ro tu parsaoran ni huria, tu partangiangan dohot tu angka ulaon huria. Alai molo tung adong pe na manulak di angka jamita na tapasahat, hombar tu tona Jesus di Mateus 10:14 mandok: “Jadi anggo so dijangkon nasida hamu manang so olo tumangihon hatamuna, tadingkon hamu ma bagas dohot hutanasida, laos pirpirhon hamu ma dompak nasida nang orbuk na lohot di patmuna!”
Benget manaon haporsuhon, ala Kristsus do pamonang hita manaon na jat i. Tung godang pe hasusaan na masa, ndang gabe pangambati mangulahon ulaon tohonan na pnasahat ni Debata tu hita. Taingot ma ndang mulak boti hata ni Debata,alai porsea do hita mangula do hata ni Debata didiri ni angka na umbegesa jala patupaonna lomo ni roha ni Debata. (Jes 55:11)
Panimpuli:
Sahat ula tohonanmi, sada joujou tu hita tarlumobi angka parhalado partohonan asa rade mangulahon ulaon na pinasahat ni Debata tu hita diganup tingki manang parhusoran. Dibagasan hiras ni roha hita pinargogoan ni Tondi Parbadia pasahathon apulapul tu angka ruas di las ni roha nang arsak pe. Toho do na nidok ni Ephorus Justin Sihombing na mamodahon tu angka parjamita: jamitaki do ngolungku, jala ngoluki do jamitangku. Lapatanna di ganup parjamita ingkon hangoluhonon Hata ni Debata na nijamitahonna angka parjamita, jala ngolunai gabe jamita tu angka na humaliang.
Sahat ula Tohonanmi! Turpuk on jumolo dipasahat tu hita laho manungguli tohonan na pinasahat ni Debata tu hita. Sian Debata do tohonan i tajalo marhite huriaNa, antong pinargogoan ni Debata ma hita mangulahonsa. Sai dipasiding ma sabat sian ganup hita be di angka ulaon siradotanta. Dilehon Debata ma gogo di hita, ringgas ni roha dohot habengeton laho mangulahon ulaon na pinasahat ni Debata tu hita.
Dirgahayu buat HKBP: HKBP Lam tu majuna
Pdt Nekson M Simanjuntak
Tidak ada komentar:
Posting Komentar