NATAL: NUNGA PATAR HASIMOON NI DEBATA

NATAL: NUNGA PATAR HASIMOON NI DEBATA

Horas ma di hita saluhutna jala selamat Natal ma hupasahat hami tu hita sude. Apala di borngin natal on dipatubegehon tu hita Barita Nauli sian Rom 16:25-27 paboahon, ia Barita Hatutubu ni Tuhan Jesus ima barita las ni roha godang. Toho do nidok ni Endetai: halalas ni roha godang na hubaritahonon on, nunga tubu si palua di hita jolma on. Hasangapon di Dsbata damedame ma di jolma. Lomk ni roha ni Debata hajolmaon muse.

Molo tauhal turpuk Evangelium di Parpunguan Natal borngin on marsaringar hataNa  mandok tu hita:

1. Natal ima barita nauli  na margogoihon bangso ni Debata. "tuk margogoihon hamu" ayat 25

 Boasa Natal Margogoihon hita, nuaeng torop do halak naung loja, loja manjalahi na ringkot di ngoluan alai ndang ra sungkup. Barita nauli ma gogo dohot las ni roha di angka na loja songon na didok Jesus; ro ma hamu tu ahu angka na loja jala na sorat asa hupasonang hamu. (Mat 11:28)

Barita Natal manang hatutubu ni Tuhanta Jesus ima gogo di angka naung gale. Aha do mambaen hita gale, gumodang ma ra ala ni sahit.  Tupa do godang sian hita naung gale loja manjalahi parubat asa jumpang hamamalum ni sahit. Di hata gorik sahit ima hagaleon; gale, surut gogo. Na boi do togos pamatang alai.orik pe sahit songfop pintor gale do pamatangna. Natal on ma gogo di hita. Tu angka na maraahit, nang pe gale pamatang alae tondinta naeng hiras.

 2. Natal papatarhon  hasimoon manang rahasia ni Debata. Naung buni di angka na deba alai patar doi di angka n porsea . "hasimoon naung dipaullop" Ay 26)

Molo tatontin di angka film isara ni halak na manjalahi harta karun, godang angka kodekode rahasia na ingkon ungkapon nasida asa jumpang harta karun. Songoni ma nuaeng Borngin Natal on mistery bagabaga naung niuarihon ni Debata marhite angka panurirang patar mai nuaeng diadopanta. Ndang buni be haluaon i, ndang siluluan be ai nunga mullop, nunga patar jalan nungga jumpang hita i di Jesus na tubu i. Songon parroha sian purba naung marnida bintangi songoni ma nang angka na porseai marnida haluaon i. Songon angka malim namambuka buku panurirang Mikha di jolo ni Herodes, songoni ma nang na porsea i marnida haluaon di diri ni Jesus. Songon si Simeon na marnida jala manjanghon Jesus di abinganna napauluaonmu ma ma bangasom.

Ndang buni haluaon i, naingkon ungkapon marhite rumus matematika. Molo songoni angka na pistar do boi marnida haluaon. Ndang buni haluaoni na ingkon jumpangan songon halak na ingkon bertapa di pigapiga tahap. Debata sandiri do papatarhon hasimoon i tu sude halak so.mardia imbar. Dipapatr do tu parroha sian purba, dipapatar do tu angka parmahan naso mardihadiha. Ndang adong alasan ni.manangbise pe ndang manjanghon Jesus i. Alanii las ma rohanta songon ende ni pardisurgoi na mangsndehon:  Hasangapon ma di Debata na di ginjang, jala dame ma di tanoon di angka jolma halomoan i.

3. Natal manjouhon hita asa gabe pangoloi di Ibana. "asa dioloi be porsea" ay 26
Molo tadok hita naung manjanghon si Paluai, tarida ma parbuena di ngolu ni hita ima gabe pangoloi ma hita di Debata.

Ndada songon si Adam be hita na mangalaosi patik na tinonahon ni Debata. Alai songon si Maria ma hita na mandok. Naposo ni Tuhani do ahu sausaut ma tu ahu songon na nidokmi.

Molo tajanghon do sipaluai, ndada sonfon si Thomas be hita na mandok ndang porsea ahu saleleng so hujama.bugang nai. Alai naeng ma hita porsea nang pe so taida.

Molo tajanghon do Jesus di borngin natal on, ndada songon si Petrus be hita na pola mansoadahon Jesus mandok ndang hutanda i jala ndang huantusi na nidokmi. Alai gabe pangoloi ma hita songon si Jesaya mandok: dison do ahu, rade do ahu suru ma ahu.

Molo tajanghon do Jesus sipaluai, pasidingon maroha Judas na manjehehon donganna manang songon roha Herodes na mamunu dht mansoadahon donganna. Alai taoloi ma Jesus na sai manjauhon hita asa gok dame dht roha na masihaholongan.

Barita nauli do barita hatutubu ni Jesus i. Ido gogo di hita. Nunga patar haluaoni di hita tajanghon ma Jesus di ngolunta jala gabe pangoloi ma hita di Debata.

Selamat Natal di hita Sude
Sian hami
Pdt Nekson M Simanjuntak