SIAPAKAH AKU - WHO AM I: REFLEKSI PENGAKUAN PETRUS

Mempersiapkan Kotbah Minggu, 3 Maret, saya lihatbada file kotbah saya bahan Sermon Parhalado HKBP Depok 1
Epistel Minggu 27 Agustus 2017
Turpuk : Mateus 16: 13-20


WHO AM I – ISE DO AHU?

Patujolo
Who am I gabe sada topik on di duru ni Huria, songon di psikologi perkembangan, suang songoni nang tu angka lembaga-lembaga pelatihan pengembangan diri. Panandaon ni diri on mansai ringkot bahkan hal mendasar tu perubahan na hinirim. Ai na maol do muba jala berkembang sasahalak molo so ditanda dirina. Panandaon ni diri i mansai porlu asa diboto didia hagaleonna jala didia potensina. Di angka lembaga-lembaga pelatihan pengembangan kapasitas berbasis Kristen (Jhon Maxwell, manang Daniel Carnigie)  topik on dikembangkan manang  diinspirasi sian sungkun-sungkun ni Tuhan Jesus tu angka siseanna. Adong semacam evaluasi sian Jesus; di naung mangula ibana sian luat tu luat marhite na marjamita, mangajari dohot angka na pamalumhon sahit sahat rodi na pahehehon halak naung mate. Songoni do angka pambahenan ni Tuhan Jesus na niida jala nisaksihon ni siseani dohot natorop i marhite angka tanda halongan: dipamenak tao sian galumbang, manamuei mangan 5.000 halak dht angka alus na lambok sian Jesus mangadopi angka sungkunsungkun ni halak Farisi, Saduse na naeng manguji dohot mangunjuni Tuhan Jesus. Alai tung halongan do sude pambahenan ni Tuhan Jesus, jala nang alusna pe tung angka pangajaran na so dung tubu di pikiran ni angka Farisi dohot Saduse do alus ni Tuhan Jesus. Baliksa manorusi tu rohanasida marparhatopot hasintongan dialus dohot na pinatupa ni Tuhan Jesus.

Molo disunghun Jesus pe dison Ise Ibana, ndada songon tujuan ni lembaga Survey sunghunsunghun i. Angka lembaga survey manguji ditanda popularitas ni sasahalak di situan natorop, molo timbo elektabilitasna gabe dibaen mai sada indikator mampromosihon sasahalak. Disunghun Jesus I naeng botoonna do intap ni dia do panandaon ni natorop dohot sisean I taringot tu diriNa.

Molo taida adong dua tahapan na pinatupani Tuhan Jesus Ise do Ahu didok halak? Tahap parjolo on, naeng botoon ni Tuhan Jesus sian angka na torop i paboa sintong do panandaon nasida di Ibana manang na ndang? Tahap na paduahon sunghunsunghun ni Tuhan Jesus tu sisieanNa; tu lingkaran na paling dekat, naung rap mangan, rap minum dohot rap mardalani nasida dohot Tuhan Jesus. Dung diboto Jesus alus naduai direspon Tuhan Jesus ma panindangion ni si Petrus I dohto dipasahat turgas tu angka na manghatindanghon Tuhan Jesus.

Panandaon ni Natorop: Ise do Ahu didok halak?
Siang angka alus na binege ni si Petrus (siseani), adong pigapiga na jumpang siseani ,ima:
a) Si Johannes Pandidi; panurirang na manuarahon hamubaon ni roha, mandidi na torop i songon tanda hamubaon ni roha. Joujoun di halongonan asa mangarade na toropi manomunomu Mesias songon naung binagabagahon ni Debata. Nunga jonok Harajon ni Debata, ndang sanga be marlembalemba ali muba ma ai na ro ma paruhuman i. sada istilah ni Mateus taringot tu haroro ni harajaon ni Debata ima: “Nunga pola ampe tangke tu daling ni angka hau.” (Mat3: 10), angka na so marparbue (hamubaon ni roha) tabaon manang tu paruhuman na ma.
b) Si Elia; sada panurirang bolon, na manghatindanghon mangolu jala marhuaso do Debata di tongatonga ni bangsoNa. Ndang olo Ibana talu binahen ni ganaganaan dohot debata ball napinatupa nisi Izebel. Tanda ni Debata na mangolu disuriranghon si elia naso ro udandi Israel  marpigapiga taon (17:1f). Marragam do angka halongangan na pinatupa ni Panurirang Elia (boi tajaha 1 Raja-raja 17 s/d 2 Raja 3): roti dohot guriguri naso mahiang si Sarfst, dipangolu na mate anak ni mabalu di Sarfat dohot angka tanda halongan na asing. Elia panirirang bolon na dihabiari ni halak Israel, jala manaek tu banua ginjang (2 Raja 2:1-14)
c) Si Jeremia: sada sian panurirang bolon (rap dohot Jesaya dohot Jehezkiel) na mangadopi hamaolon sian angka panurirang na asing diancam ala manurirang (Jer 11:18-23; 26:-21), naeng dibunu (Jer 26:1-24), dipenjarakan (Jer 37:1-21), didabu tu sumur (Jer 38:11-14).Jadi molo ditanda na toropi do Jesus songon si Jeremia nunga diboto naeng adopan ni Jesus do angka hamaolon songon na niadopan ni si Jeremia.
Sian saluhut panandaon ni na toropi, panurirang bolon do Jesus songon na hinaporseaan nasida, na sinuru ni Debata dalan paubahon roha, jala mamboan nasida tu Harajaon ni Debata.

Panghatindanghonon ni Si Petrus: Ise do Ahu didok hamu?
Dialusi si Petrus do mandok: “Kristus” (Mesias), Raja na Pinarbagabagaido Ho, Anak ni Debata na mangolu”.
Asing do alus ni si Petrus on sian na toropi, nunga ditanda ibana ise Jesus ndada sebatas panurirang na patubegehon hamubaon ni roha dohot na pasahathon panurirangon taringot tu haluaoni. Alai hagogok ni haluaoni do, ima: Kristus, Mesias anak ni Debata. Kristus marharoroan sian hata Gorik  () manang di hata Heber ( מָשִׁיחַ ) (Masyiakh)

Marhite pandohan Kristus dipabotohon paboa Jesus ima naminiahan (diurapi). Di Padan Narobi holan tu Raja dohot Malim do dipatupa pandohan “dimiahi” (diurapi).  Jala na targoar na miniahan ni Debata, Gok tondi ni Debata nama di Ibana (Pat 1 Samuel 16:13)

Jadi, molo dihatindangkon Petrus do Jesus: ima Kristus (Mesias), lapatanna di disi  Jesus do Mesias na niuarihon ni angka Panurirang sian Padan Narobi. Ibana do Raja na paluahon bangso Israel hombar tu na sinurirangkon ni angka panurirang Mikha 5:1, Bethlehem Hatubuan ni si Palua, Raja Sipardame (Jes 9:5ff), Naposo Ni Debata (Jes 53), Nimiahan ni Debata laho mamaritahon Barita Nauli tu halak na dangol… dst (Jes 61:1).  Domu tu hamalimon, Jesus do malim bolon na masuk tu inganan na sun badia na mamelehon diri gabe pardengganan dohot Debata (Heber 7:21). Kristus do pelean pardengganan tu Debata jala Ibana do malim bolon.

Siani boi ma taida panandaon na lengkap paboa tolu tohonan ni Tuhan Jesus Panurirang, Raja dohot Malim. Laos tohonan ni Kristus na tolui do na diradotan ni huria dohot parhaladona songon na diondolhon di konfessi HKBP bindu 9.

Martua do Halak Namananda dohot Manghatindanghon Jesus Kristus
Dung dihatindanghon si petrus ise Jesus, dialusi Jesus do ibana mandok: “Martua do ho Simon…” On do las ni roha di ganup halak na mananda jala manghatindanghon Kristus di ngoluna. Martua, ido na pinarsinta ni hajolmaon.Hata martua nungga dihanghami; ngolu na sonang, ganjang umur dohot ragam ni parsaulian. Hata martua na pinasahat ni Jesus dison ndada holan parsaulian di hasiangan on, alai dohot do di hangoluan si saleng ni leleng na. Halak na porsea jala manghatindanghon Jesus dingoluna ido dapotan haluaon (Markus 16:16).  Ndang marisuang parsiajaran naung diguruhonna nasailain,ndang marisuang angka na niida jala na nialami ni ibana rap dohot Jesus na sailaon, tung tangkas do diboto jala ditanda Ibana Jesus.

Adong do tugas ni na mananda dohot na manghatindanghon Jesus:
1. Paojahonhu HuriangKu
Dung dihatindadnghon si Petrus Jesus I do Kristus, Mesias, Anak ni Debata na Mangolu. Dungi didok Jesus ma: “diatas batu mamak on do paojakhonHu huriangKu. Siani taboto tangkas marhite na mananda dohot na porsea di Jesus Kristus Anak ni Debata do dipaojak Jesus Kristus HuriaNa di portibi on. Jala ojahani pe diatas Batu Mamak na togu. Haporsean do ojahan ni huria na marojahan di bagasan Jesus Kristus. (Pat 1 Korin 3:11).
2. Nasa niihotan di tanoon tarihot doi dibanua ginjang
Timbo do huaso jabatan apostolicum na pinasahat ni Jesus tu si Petrus maniop anak hinsu banua ginjang. Adong do huaso ni huria paluahon halak sian dosa asa taruli di haluaon. Leleng do Rom Katolik menganut paham Ex-Cathedra (Paus menjalo haapostelon na pinasat tu si Petrus) dohot infalibilitas (Paus tidak pernah salah); ala bapak suci jala marojahan sian penafsiran ni ayat: 19. Dilinggomi Tondi Porbadia do Sri Paus asa unang sala manang mardosa. Jadi saluhut haputusan na haruar sian Paus sian Ex-Cathedra ndang mungkin sala. On do sada na dialo ni Marthin luther, haluaon I holan ala ni asi ni roha do na tajalo dibagasan haporseaon.Suang songoni nang indulgensia (surat penghapusan dosa). Suang songoni nang huaso pastor na boi paluahon halak sian dosa (marhite na manesa dosa ni halak na mangido hasesaan ni dosa). Molo Marthin Luther mandok holan di bagasan Jesus Kristus do hasesaan ni dosa na tajalo marhite haporseaon.  Dijalo huria do ulaoni hasesaan ni dosai marhite Sakrament. Menurut M. Luther holan dua asi ni roha ni Debata na patar manjalo haluaon, ima: Pandidion na Badia dohot Ulaon Na Badia.  Jala ido umbahen na holan tu Partohonan Pandita (ordinansi) patupa ulaon Sakrament ala menyangkut tu ulaon apostolicum.

Sian ayat 19 on do tong na pinangke ni Huria pasahat uhum huria, alai tutu ingkon jolo mandalani ruhu-ruhut na tontu di ualon parmahanion. (Pat Mat 18:15-20). Molo tajaha do pamonai ni RPP (Ruhut Parmahanion dohot paminsangon ni huria) tung tapasiding ma huria sian na pasahat uhum; gari manguhumuhumi ndang boi. Alai baliksa molo adong na so tarjua ala ni pangalaho na sun marhina mago na boi huria pasahat uhum marhite na maningtingkon naung dibalian ni huria sasahalak.

Disuru Tuhan Jesus asa unang pintor dipaboa, ai ndang dipaujung Tuhan Jesus dope ulaonNa. Ai ujung ni parulaon ni Tuhan Jesus ima Silang; hamamate dohot haheheonNa. Diorai asa marpaima nasida, di angka ulaon nanaeng pasingkopon ni Tuhan Jesus.

Pangarimpunan:
- Denggan do tabaehn rujiruji di ngoluon mananda diri; nunga ro didia parsitutuonta na mananda dohot na manghatindanghon Kristus.
- Halak na mananda Kristus tarjou do gabe huria na mangolu; na manghatindanghon dohot na marpambahenan di ngoluon asa patar asi ni roha ni Debata, ima haluaon sisaleleng ni leleng na.
- Molo diturpuk on, diorai unang dipaboa, alai huria naung mananda Kristus I naeng ma pasidohot hita mambaritahonsa. Ai nunga hehe Kristus i. Hehe ma nang haporseaonta.

Pdt Nekson M Simanjuntak