RINGGAS : Pangalaho Sipujion Di Parkarejoan -1

 Pangalaho Sipujion di Parkarejoan - 1:

"RINGGAS"

Di piga ari na salpu niarbis do adong do na boi putihanta etos kerja di halak Batak, ima na tagoari "pangalaho sipujian di parkarejoan". Manang sungsunsungkun, songon dia do pangalaho na dihalomohon sian sasahalak tingki mangula ulaon? Siani ma dirisihan, adong pitu pandohan na boi outihanta ima: ringgas, nunut, radot, padot, hobas, hibas jala hinsa.

Di tingkion niuji majo manggurithon taringot tu pangalaho sipujion na parjolo, ima: ringgas.

Domu tu pandohan ringgas on, gabe huingot panghataion namu tolu halak pandita ressort. Sidung pembinaan guru sikola minggu na opat Ressort, Parpulungan Nauli, Tiga Lingga dohot Sukandobi April 2009 na salpu. Hundul do hami pandita ressort na tolu marnonang jala manaringoti panghobasion dohot angka natau sihobasan di huria huhut . Ndang dohot Pandita Ressort LaeMeang ala pintor hatop mulak ala adong partangiangan siuluhononna. Hupaboa tu dongan adong sada huria pagaran na tung sihol roha ni huria asa adong pangula na Gok Tongki manghobasi nasida. Molo boi antar naposo ma nian manang pandita praktek ala i dope na tuk huria bolas balanjoannasida. Ai ujui desentrisasi dope huria HKBP, lapatanna huria i do na manggohi dohot manggugui balanjo ni pangulana. Alai mauliate ma dung 1 Januari 2023 nunga bolas HKBP pasauthon sentralisasi, sude parbalanjoon ni pangula na gok tkngki nunga sian hatopan be manang na ginoar sian Sentralisasi Parhepengon Hatopan.

Husungkun ma donganku pandita ressort Sukandobi betak adong ditanda pandita naposo manang na praktek pe na boi usulhonon. Dialusi ma, adong do nian hutanda na malo ninna di sikolana alai hurang barani mangusulhon goarna ala sada hahuranganna ima hurang ringgas. Pintor ro ma muse pandita Ressort Tingga Lingga pintor didok ma, molo tusi memang ingkon na ringgas do. Songoni ma nonang nami natolu laos mangallang durian na mansai tabo na dilehon ni ruas siparsaulihononnami. Sandok hami na tolu sapandapot do ingkon na ringgas ma nian na ro manghobasi huria i, unang malo alai losok, ai ndang marniula ulaon ni halak na losok.

Songoni ma jo nonangi angka dongan, sude do ra hita sapandapot paboa molo mangaririt sahalak pangula tu sada ulaon isara di huta manang di kantor manang perusahaan pei tontu sai dipatujolo halak na ringgas. Ai boi do tutu sasahalak pistar, adong titelna alai losok mulaulaon gabe tarhirim halak diulaonna. Adong do muse malo jala deak manghatai alai ndang diulahon na didokna, digoar mai holan hata manangbteori sambing.

Bangko na ringgas on ma sada pangalaho sipujion di halak Batak di parkarejoan. Boi do taida tingki mamillit uluan ni angka punguan manang sarikat manang parsahutaon pe, sai dipatujolo do halak na ringgas. Ai na rumingkot di punguan ima ringgas manopot na masa di ruasna manang ulaon las ni roha nang arsak pe. Molo so ringgas sahalak uluan ni punguan ndang marsahala punguani, tading ma angka siradotan gabe paro ungutungut tu ruasna.

Ringgas manang digoari maon dihata Indonesia "rajin". Adong do pandohan di hata Indonesia: "rajin pangkal kaya". Molo talapathon "ringgas bona ni hamoraon". Alai molo di halak Batak pandohan "ringgas" songon naso mardomu do tu hamoraon. Alai pandohan ringgas domu doi tu na rade, sigop jala radot di angka na patut siulahonna.

Hata ringgas di hata Batak ima patuduhon harade ni roha manopot angka ulaon dohot angka na masa di na humaliangsa. Ndang hea tartading ibana di angka namasa di hutana, ndang tartading ibana diulaonna di balian jala rade tongtong mangurupi dohot mangalehon gogona tu donganna.

Pandohan ringgas ima hata pangalaho (kata sifat). Molo digoar ringgas, dipatuduhoni do haradeon ni roha, ndang marpaima laho mangula ulaonna. Aha pe nasa di hutana sai tongtong rade rohana. Rade rohana manggohi gongkhon dohot joujou ni donganna, jala rade nang rohana manang andigan pe ibana disuru mulaulaon tongtong rade rohana laho mangulahonsa.

Pandohan hata ringgas patuduhon roha na mangoloi, ndang olo manjua manang mangalo parsuruon. Sadihari pe ibana disuru sai tongtong mangoloi so marimbar tingki. Naboi do godang ulaon, alai nang pe godang ulaonna rade nang rohana mangulahon na asing. Dihudus do mangharejoi na sada, asa boi bolas muse ulahononna ulaon na asing. Sahalak na ringgas ndang olo pabenda ulaonna mandok, marsogot mai manang minggu na ro. Aha na boi diula saonari, diulahon. Sai hira adong dirohana, marsogotnbetak adong ulaon naasing gabe so sanga molo dipabenda. Tung dipataridahon ringgas ni roha do parsitutuon mulaulaon dohot haradeon ni roha jala ndang olo manjua jala pabenda ulaon.

Sahalak na ringgas rade do on mandohoti angka ulaon di huta manang di balian, diulaon adat, diulaon las ni roha arsak pe. Tung so tartading ibana di nasa ulaon dohot namasa di huta manang luat.

Sahalak na ringgas mulaulaon gabe dihalomohon halak jala dihaporseai halak ibana mangaradoti ragam ni angka ulaon. Halak na ringgas gabe parsaulian maradophon angka donganna. Ndang hea halak tarhirim diharadeonna mangula siulaonna ala tongrong pangoloi dijoujou manang parsuruon pe.

Suharsuhar ni ringgas ima malas manang roha na bangkol jala losok mulaulaon. Sai hira na tarrante do simanjojokna laho mangalangka manopot ulaon, manang hira lohot tanganna gabe tungkol isang manjama ulaonna. Molo didok tu sasahalak "silosok" di halak Batak nunga tung sambor nipina, ai ndang mungkin be tuganon ni halak ibana laho mangula. Ai jotjot do tarhirim halak di pangulaon ni halak na losok, ai jotjot tarsabat jala tarlambat na niulana.

Halak na losok mulaulaon digoari doi si "gurbak ulu". Tudosan do tutu pandohan sigurbak ulu. Gurbak lapatanna: balga, bolbol jala bosol. Jadi tudosan doi mandok gurbak uluna gabe hira so tarteasa be simajujungnai, ujungna gabe bangkol jala losok mula ulaon gabe digoar ma sigurbak ulu. Sahalak na losok sai ditait matana tu podoman gabe ndang olo mulaulaon, molo jongjong pe ibana diulaonna sai pintor heheamon songon na hurang modom.

Dipasiding halak do halak na losok manang sigurbak ulu diulaon siadapari. Ai harugian bolon doi, dipartugan gogo ni donganna hape ibana sandiri tung gurbak uluna.

Sipodaan do halak si gurbak ulu asa ringgas, ai ndang adong bohal ni ngolu jumpang di halak sigurbak ulu. Ido umbahen na ditonahon di hata ni Debata hombar tu na tarsurat di Poda 6:6 (TOBA) "Laho ma ho, ale sigurbak ulu marsiajar tu porhis, parateatehon ma angka dalanna, asa marbisuk ho!"

Tapasiding ma pangalaho na losok alai tapareahi ma pangalaho na ringgas, ai pangalaho sipujian do halak na targoar ringgas. Ndang mardia imbar disi ulaonna aha pe disuru tongtong girgir rohana mangulahonsa.

Adong dope sada nai pangalaho sipujion sian pandohan na ringgas ima dao sian roha na ahut di diri. Ai boi do tutu sahalak ringgas mulaulaon ala adong nabinuatna. Ringgas si songoni digoari mai ringgas na marpangait; ringgas molo adong parsauliaon alai losok molo soada parsaulian.

Pandohan ringgas di tonga ni halak Batak ima pangalaho sipujian ala sai tongtong rade jala pangoloi di ragam ni angka ulaon. Pangalaho na ringgas ima tongtong rade, ndang mardia imbar tingki dohot ombasna, so pola maretong diparsaulian manang harugian pe. Halak na ringgas ndang hea tartading ibana di nasa siulaonna. Halak na ringgas gabe sai dipatujolo halak ibana mula ulaon.

 

Tabe:
Pdt Nekson M Simanjuntak

Molo boi ditambai dongan asa lam umbagas. mauliate