HOBAS: Pangalaho Sipujion di Parkarejoan - 6

 Pangalaho Sipujion di Parkarejoan - 6:

"HOBAS"

 

Bidang do na dihamham pandohan na "hobas", ala nunga hira sude mamangke pandohan parhobas di partingkian nuaeng. Ujui ra holan ulaon adat dohot huria do targoar mamangke pandohani, alai anggo nuaeng nunga ragat pamangkena tarmasuk ma pamarenta, parpolitik, polisi, ruma sakit, ruma makan, partigatiga dohot angka ulaon na asing na mardomu tu haporluan ni situan na torop (layanan publik). Isara ni pamarenta adong pandohan na mandok: parhobas tu rakyat. Molo polisi: "siap melayani masyarakat" (rade mangobasi rakyat) dohot angka pandohan na asing domu tu na hobas tu rakyat. Siani lam tubu do turoha ni sihatoropan paboa angka parjabatan tujuanna ima manghobasi na ringkot di situan na torop. Jadi ganup parkarejo targoar do parhobas. Molo tu angka partigatiga manang parboniaga sada uhum doi marhobas tu angka panuhor marhite na uli panghulingna, didodo roha ni panuhor tuk ni hepengna, ai lam denggan panghobasion tu angka panuhor boniaga bah lam lomo ma roha ni torop halak marboniaga tu nasida. Jadi lam hobas lam tamba parsaulian alai sabalikna molo so denggan panghobasionna bah sumurut do angka panuhor na ro tusi. Tapatudos ma jolo songon sada lapo manang ruma makan: boi do tabo lompalompana alai molo so lambok do nasida manghobasi halak na ro mangan tusi boi do gabe parsahalian. Alai molo uli panisena jala sigop manghalaputi na ringkot di nasida gabe olo mulak roha mangan tusi muse.

Pamuhai dope nunga naeng godang dohonon taringot na pangalaho sipujion na paonomhon on im "hobas". Domu tuson las roha di sada guretguret manang artikel na sinurat ni amanta Posma Siahaan di laman Kompasiana mandok Parhobas: relawan yang selalu hadir dalam adat Batak. ida https://www.kompasiana.com/posmasiahaan/550e694ba33311b32dba8151/parhobas-relawan-yang-selalu-ada-di-acara-adat-batak. Artikel on mangondolhon boru do parhobas di ulaon adat ndang mardia imbar manang jenderal pe ibana, parpangkat na timbo jala namora, molo nunga ulaon adat di hulahulana rade boru gabe parhobas.

Asa tangkas pangantusionta taringot tu na hobas on, ingkon borhat do hita lapatan ni "parhobas" di tongatonga ni halak Batak. Ai pangalaho ni parhobas i do na ginoaran hobas.

Molo masa ulaon adat manang horja di sada huta, sai dipabangkit do parhobas. Tutu sian horong boru dipabangkit parhobas, alai di luat parserahan ndang sai apala boru ketua parhobas alai na pinillit ni angka natuatua ni huta do jala diida denggan parrohaonna. Donganan ni boru ni suhut ima parhobas i asa molo aha na ringkot ndang pola langsung suhut bolon be alai boru nasida ma parhiteanna. Parhobas i do na mangaradoti nasa ringkot di horja mangurupi suhut. Namanguluhon parhobasan i digoari ma sintua ni parhobas manang katua parhobas. Turgasna ima mangaradoti angka siulaon na ringkot di adat manang horja i. Parhobas mangurupi suhut sihabolonan diulaon jala halak na haposan. Ai tu nasida do diampehon hasuhuton nasa na ringkot tu ulaon i asa sonang so hariboriboan situan na torop mandohoti ulaon i. Asa silemlem urukuruk, silamlam aek toba, na metmet ndang marungutungut sude marlas ni roha. Ido sintuhu ni ulaon ni parhobas.

Angkupnii mansai balga do tanggungjawab ni parhobas di ulaon adat ni halak Batak. Sahalak parhobas ingkon diboto aha do goar ni ulaoni, sadia bidang, angka ise raja na niontang tu ulaoni, parpeakna ni parjambaron sahat tu parhundul ni na torop sahat tu na maretong sadia ma asam ni juhut manang boras sipangkeon tu ulaon. Radotan ni parhobas ma i saluhuta, dungi haraonna ma donganna sahuta, sian boru ni angka suhut rodi angka naposo na mangurupi nasida laho marhobas.

Sahalak parhobas ingkon rade rohana mangula ulaoni jala parbue ni ulaonna ima hasonangan tu situan na torop dohot las ni roha ni hasuhuton. Parsitutuon ingkon adong di sahalak parhobas, ndang boi mura mardandi manang mandele.

Ingkon sigop do parhobas mamboto pardalan ni ulaon, disi masa panghataion tinggil ibana parade aha na dihaporluhon di parnonor ni ulaoni. Molo nungga tingkina pasahat tudutudu ni sipanganon, pintor sigop do parhobas pasahathon i jala lehet dipauli.

Sahalak parhobas ima roha pamelehonon ni diri, gogo dohot tingki pe asa denggan mardalan ulaoni sian bonana sahat tu ujungna. Ingkon tinggil sipareonna manangihon goragora ni hasuhuton dohot situan na torop angka dia na hurang. Parpudi do mangan parhobas, ai jolo singkop do sude nasa ringkot di situan na torop dungi pe nasida mangan. Nasida do nian partanggo juhut di ulaon adat, alai ndang nasida manontuhon balga ni tanggotanggo sijaloon ni parhobas. Ingkon na digorahon ni raja parhata i do jambar sijaloon ni parhobas. Jala parpudi do parjambaran dimpasahat tu parhobas. Lapatanna disi, roha na pajolohon na ringkot di dongan do ulaon parhobas.

Sahalak parhobas ingkon boi do uluan jala boi rap karejo. Ala torop do parhobas mangaradoti ulaon di halak Batak; adong doi sihobasi indahan, sihobasi juhut sian sitangkup pinaha pangalompa, mangalap mual, pabolak amak dohot na asing i, tontu sintua ni parhobas ima sahalak na marsahala; marsahala ibana marsuru angka donganna tu angka ulaon naung disagihon, gari suhut sandiri molo nunga dipasahat tu parhobas naso jadi be antoan manang babaanna parhobas diulaon. Sandok nunga hobas nasida mangulahoni saluhutna sian bona sahat tu ujung na.

Sian hatorangan na di ginjangi, tabotoma songon dia do pangalaho na hobas. Hobas ima haradeon ni roha mamelehon diri laho mangaradoti sada ulaon asa denggan sude, sonang nampuna ulaoni jala sonang roha ni situan na torop na niontang tu ulaon i. Hobas ima parpinggol na tinggil manangihon aha na hurang dohot aha na ringkot di ulaonna. Hobas laos dihamhami do roha na ringgas manopot ulaon sian bonana sahat tu ujungna. Hobas lohot do muse halak marsahala na mangaturhon ulaoni rap dohot angka donganna, rade rap mangula asa tiur sude ulaoni. Halak na hobas ima halak na pajolohon na ringkot di dongan, dao sian roha na ahut di diri.

Pandohan parhobas on jumpang hita ma nangbdiulaon ni huria. Di ulaon huria angka na martugas di ulaon minggu nang isara ni partangiangan pe digoari do parhobas. Parhobas ima sian horong ni parhalado partohonan dohot naso partohonan. Molo diulaon hamalimon tontu na marhobas ima angka partohonanan: marjamita, maragenda, manjaha tingting, papungu pelean. Angkupnii adong so parhobas naso parrohonan ima isara ni parpoti marende dohot manguluhon ende. Doa do lapatan ni parhobas di ulaon huria nang diulaon na ginoaran ondeng. Asa dohononta ma ganup parhalado naeng ma hobas di nasa siulaonna. Pamelehonon ni diri laho mangaradoti na ringkot tu ruas ni huria.

Muba do pangalaho na hobas dijaman nuaeng? Mansai godang do parhusoran na masa di ulaon adat di tongatonga ni halak Batak. Songon na tagoari adong komersialisasi ulaon, ndang pola parhobas be manguluhon silompa juhut dohot bohal na ringkot di ulaon ai nunga masa katering. Alai nang pe songoni anggo sintuhu ni parhobas hot do, ima mangaradoti ulaon sian binana sahat tu ujung na asa marturw parohon las ni roha tu situan na torop. Molo masa parhusoran songon na tagoari tontu ala ni hamajuon ni jaman doi jala mangurupi situtu. Ala ni partikian nuaeng na lam maol mangatur tingki ni angka parkarejoan mangaradoti ulaon di huta nang di dongan. Nang pe masa katering (dipalompahon) nasa na ringkot tu ulaon pestai alai anggo ulaon ni parhobas ingkon tong do tiroanna saluhutna. Pinomat mamareso, mamatamatai dohot pabotohon songon dia parpeak ni angka sihobasan di ulaon i asa tiur denggan sudena parohon las ni roha tu situan na torop.

Di ulaon na marragam nuaeng di parkarejoan pangalaho na hobas on boi do boanonta di ulaon kantor ni pamarenta, nang suasta pe nang di ulaon dia pe. Hobas di ulaon, ima pangalaho sipujion di parkarejoan ala diboto bona sahatntu ujung ni ulaoni, aha na ringkot tusi jala ise na boi suruonna tusi. Hobas ima pangalaho na tongtong mamelehon diri, pajolohon na ringkot di halak. Dirohana songon dia do ibana asa marguna tu halak na asing.

Taparsitta do asa gabe sude anak dohot boru ni halak Batak marpangalaho na hobas di parkarejoanna be asa lam marhasonangan luatta nang bangsonta.

 

Tabe
Pdt Nekson M Simanjuntak