NUNUT SIRAJA NI OMPUNA: Barita ni Ompu Nunut dohot Ompu Geas

 NUNUT SIRAJA NI OMPUNA

Barita ni Ompu Nunut dohot Ompu si Geas

 

Ulahon ma haporseaonmu! Ido tutu sintuhu ni taon na binuhul ni huria HKBP di taon 2023 na ginoaran Tahun Profesionalisme Dalam Penatalayanan: "Kerjakanlah Keselamatanmu!". Poda na mansai tangkas paboa ingkon ulahonon do haluaon naung tajaloi marhite haporseaon sahat tu haroro ni Tuhan i asa dohot parjambar di hangoluan sogot. Na binuhul sian Pilipi 2:2. Tona na mansai arga unang ma holan dihata angka porsea alai ingkon ulahononhon do haluaon na nihaporseaon i.

Saurdot do i nidok ni poda ni Reformator na mandok: "ora et labora" lapatanna "martangiang huhut mangula". Alai olo do tutu sasahalak diula na dua martangiang dohot mangula alai ndang mardomu. Martangiang ibana alai ndang adong domu ni na tinangianghonnai tu na niulana. Molo songoni ingkon lapathonnon tu jamita ondeng jala dohononta ma: ulahon tangiangmu. Ai aha ma gunana sai martangiang mangido tu Debata asa sinur pahanpahanan alai ndang olo marpahanpahanan, sada manuk pe so dipahan ibana. Songon dia ma Tuhan i mangalusi tangiang ni sahalak mandok asa gabe na niula hape ndang adong manuan boni manang aha di haumana? Nda na manuan boni do parhauma i asa manghirim di gotilon sihirimonna? Molo martangiang hita mangido tu Debata asa sinur pahanpahanan jala gabe na niula ingkon ulahononta do marpahanpahanan dohot mangula porlakta asa manumpak Tuhani suang songoni ma nang angka ulaon na asing, taulahon ma angka naung tangiangkon asa manjadi bahenon ni Tuhan.

Domu tusi gabe huingot ma disada huta ima barita ni Ompu Nunut dohot Ompu si Geas, songonon ma baritana:

Disada huta mian do dua halak na maraleale ima Ompu Nunut dohot Ompu si Geas. Ndang apala ditanda halak gelar na Ompu si Geas alai ditanda halak do ibana Parhata Manggang ala di huta sai pajotjothu do ibana marhata manggang. Marasing do karakter ni nadua on, nasada nunut songon goarnai na sada geas, sai hira so tu dia, manang aha pe siulaon sai tong marpaitte jo, jala sahat tu andigan ni paima paittena laos so ra jumpang do.

Ia ompu Nunut, nunut do ibana, ringgas marminggu jala olo manangihon hata. Ganup jamita na marimpola binegena diulahon ibana. Hea ma sahalak parjamita manjamitahon gambiri, hasea ni gambiri dohot argana. Marsogotnai dihalaputi ibana do manjalahi didia do dapot boni ni gambiri. Marjanji ma parjamitai molo ro ibana diboan pe tu ompu Nunut boni ni gambiri. Digohi parjamita i do janjina diboan pigapiga bibit ni gambiri. Dungi disuan ompu Nunut ma sada di pudi ni jabuna, dungi pigapiga di pollakna. Hira sangkidop mata pardalan ni tingki lobi onom taon hira nunga sude parhutai mandai gambiri ni ompu nunut. jala ompu Nunut do parjolo manuan gambiri di huta i.

Molo ompu si Geas, sabalikna do i, dung dibegei jamita gambiri na jinalahan ni ompu Nunut pintor didok ibana, na loak do halak na manuan gambiri, hudok ma tu hamu ndang gambiri suanon molo naeng dapotan hita, ai ummarga dope hau jati sian gambiri dohot angka mansam nisuan suananan na arga dipajojor ompu Geas ma dilapoi. Apil do ibana di ragam ni angka suansuanan tutu jala sai dipandokoni do hasea ni ganup suansuanan hombar tu na binegena dohot na diida niibana. Alai anggo sada pe sian hau na pinandoknai laos so disuan do dipollakna. Pollakna pe tarulang ai so hea nanggo apala di dulo ompu si Geas. Holan ompu Geas boru tu juma manang tu porla dipartugan ariari.

Dapot ma sada tingki adong program ni pamarenta mangurupi pangula marhite na dapot boni ni eme sian pamarenta ganup huta. Ganup ruma tangga dapot ma 2 sak boni marasam 20 Kg ganup sak. Dungi dijou hampung ma sude panduduk ni hutai asa ro tu partungkoan ala laos ro sian dinas pertanian patorangkon keunggulan ni boni ni eme i dohot cara songoni manuan, aha pupuk jala songon dia siradotan ni pangula sahat tu na panen.

Sidung sian partungkoan jumpang ma Ompu Nunut dohot Ompu si Geas di sada lapo. Tarsomal do ompu Nunut dung mulak sian hauma botari, sai ro tu Lapo minum tes manis songon mangalap gogo andorang so modom. Molo ompu si Geas sian manogot sahat tu Botari di Lapo i do ibana hundulhundul, manghatahatai ai so hea ibana tu hauma manang tunporlak pe. Dipaboa Ompu Nunut ma simbur do bonii dung disuan, lomak jala tolmoktolmok. Ai sadari dung dijalo boni pintor diradoti ibana do hombar tu hatorangan ni Dinas Pertanian i. Loja do ibana marsual molo sangga jumpang. Molo ompu si Nunut angka pertubu ni boni dohot na nilanai do dibaritahon ibana, ai las rohana ai lomak do bulung ni eme na sinuannai. Baliksa ompu si Geas, diorai do ompu si Geas boru manuan boni na lean ni pamarenatai, ai massam do surasura ni rohana: sipata ma didok ibana sotung na manegai eme lokal do boni on. Di ari na asing muse didok ai leleng do panen on. Ganup diida ibana di tivi gagal panen pintor didok ai na gagal panen do diluat adui umbahen na ditongos bonion tu hita on. Sai songoni ma ganup ari. Habis do ari arina holan na marmanggangi jala holan na marsura na so denggan taringot tu Boni na sian pamarentai. Ditingtingkon ibana pola di lapoi mandok ida hamu ingkon moru pangulaon taonon, ai boni na nilehoni pamarentai ndang cokcok tu luatta on. Toho do ompu si Geas ibana, ndang olo manuan bonina, laos simpan songoni di talobatna. Anggo parhutai nunga diboto songon di ompu si Geas on. Massam do hata alai so hea diulahon ibana na didokna.

Anggo ompu Nunut dohot na hutai diula be do haumana, hombar tu tona ni dinas Pertanian i. Dung disamei, marsuan di hauma naung dijetor, dipatiur aekna, dung i marbabo asa unang tubu duhut na pamatehon emei jala dipupuk di tingkinq dohot denggan, diapei dohot jala dung haruar biur ni emei mamuro asa unang diago pidong. Nunga dapot tingkina panen, las do roha ni Ompu Nunut dohot angka na olo mangulahonsa, ai ganda do parbue ni emenasida di taon on ala boni naimbaru sian pamarentai jala argana pe dumenggan. Marolopolop nasida ala boi denggan paremean. Pangula ni huria pe di huta las roha ala sude do pataruhon udur tunpesta gotilon jala pasahat pelean taonnasida tu huria. Sude sahutai manghatindanghon nangkok do partaonan di hutai. Dungi ro ma Ompu si Geas disual ibana ma na torop mandok: ndang ala ni boni ni pamarentai, alai memang na napu do hutantaon, jala denggan paremean taonon. Mengkel suping do na deba mambege hata ni Ompu Geas.

Dongan panjaha, didok natuatua: Nunut siraja ni ompuna. Halak na nunut mulaulaon ido halak na marsaulihon parbue na niulana. Ndang ala ni deak ni hata, manang godang ni pikiran na pinatolhas gabe taruli di parbue ni ulaon. Halak na mangulahon na tinangianghon taruli di las ni roha bahenon ni Tuhan i.

 

Tabe: Pdt Nekson M Simanjuntak