NUNUT; Pangalaho Sipujion di Parkarejoan - 2

 Pangalaho Sipujion di Parkarejoan - 2: 

"NUNUT"

  

Di piga ari na salpu niarbis do adong do na boi putihanta etos kerja di halak Batak, ima na tagoari "Pangalaho sipujian di parkarejoan". Sian ma dirisihan adong pitu pandohan na boi outihanta ima: ringgas, nunut, radot, padot, hobas, hibas jala hinsa.

Nunga dipatorang na parjolo ima ringgas. Nuaeng niuji majo manggurithon taringot tu pangalaho sipujion na paduahon, ima: nunut

Tingki SD iba tinanda dope baion alai parpudion mulak au tu huta songon naso jumpang be baion di hutanami. Ndang huboto boha do nuaeng di huta ni angka dongan. Sotung naung punu baion i tutu ai so adong be na mamangke amak manang lage dibagasna parpudi on. Nunga lage palastik manang terpal dipangke, tarlumobi di angka ulaon ni halak Batak nuaeng ndang piga be hundul di amak tiar alai di kursi nama jala di bagas gedong.

Tingki di huta, huingot dope manabi baion, dijomur ma baion i jala diduda diatas ni batu na datar dungi tutu lemes baion i. Dungi dibau ma adong na gabe: hajut, deba tandok jala adong na gabe amak mamang lage. Ai lage do dibaen natuatua panjomuran ni eme.

Nunga boi tabilangi songon dia godang ni baion tu sada lage. Tontu ingkon godang do baion tutu. jala piga halak paronan ujui manang tu hauma sai hajut do diboan inganan ni angka bohalna.

Asing ni baion adong do tong lage pandan.  Marsuga do pandani hira segitiga, niarit ma suganai dungi dibola hombar tu bidang na nihaporluhon, dungi dijomur. Dung mahiang dibau ma gabe adong ma lage pandan. Sumaksa do idaon lage pandan sian lage baion.

Tontu gabe sungkunsungkun do rohanta aha do pardomuan ni mambau baion dohot hata nunut? Tapaihutihut ma hatorangan on.

Dung hujaha pangalapation ni hata nunut di "google"  dihonahon tu hata "telaten". Uli do pangalapation i, alai dung lam nirisihan nunut ummampit do tu hata: "tekun", jala marpardomuan tu hasabaron, halak na sai tongtong manguduti ulaonna, dapot ari diuduti ulaonna, dapot ari diuduti ulaonna sahat tu na sidung.

Disi taboto ma pandohan nunut ima dihonahon tu sahalak na sai tongtong mangulahon ulaonna intap ni gogona sahat tu nasidung ulaonna. Olo do sipata marsohot ulaoni ala ni ronsot ni ulaon na asing, alai dung sidung diula diuduti ma muse ulaoni.  Sabar ibana mangulaulaoni jala rade manguduti sahat tu na sidung. Ndang targoar sasahalak nunut molo ndang marujung ulaonna. Hata nunut ima tu halak na sai tongtong manguduti ulaonna, nonor jala jojor sahat tu na sidung.

Asa ummura lapathononta pandohan nunut on boi ma taida songon sahalak siula hauma. Sahalak parhauma tontu godang do siulahononna mamungka sian na mamillit boni, marsame, mangombak balik, marsuan, marbabo, mangapei, mamupuk, mamuro sahat tu na panen. Sude diula mansai nonor jala jojor gabe targoar ma sahalak pangula na nunut. Parbuena ima taruli di hasilna jala taruli dung jumpang panen. Jadi pandohan nunut ima nang pe godang sihobasanna di haumai alai ndang ditadingkon, nang pe loja, ganjang tingki jala ragam na ingkot sihobasan i alai diula do tongtong sahat tu na sidung jala sahat tu na marhasil.

Pandohan nunut boi do muse tarpatudos tu sahalak partonun. Partonun ima na paulihon ulos. Ulos na tapangke nuaeng ima parbue ni nunut ni sahalak partonun. Sian bonang, mambaen uarna, manjomur bonang, sahat tu na martonun.  Nunut ibana, dibuat sadasada bonang i, dungi dipabaris, dungi muse dipabaris muse marhite alat ni tonun jala songoni ma sadasada bonangi dipajojor sahat tu na gabe sada ulos na uli. Olo do ra punu nang partonun on, ai nunga paberik be pature ulos nuaeng. Alai mauliate ma diida di Tarutung dohot di Samosir hot dope adong partonun.

Pandohan nunut boi do tong tarpatudos tu sahalak pambau. Pambau ima sahalak na mambaen amak manang lage sian baion. Molo nuaeng ndang jumpang be lage na sian baion. Lage manang 'terpal' sian palastik nama dipangke parbue ni masin manang industri. Andorang soi ia lage na tinanda ni halak Batak ima amak tiar manang lage na marharoroan sian baion. Dibuat baion i, dijomur, dungi diduda gabe lemes. Dung lemes dibau ma baioni sadasada, siani ma marsusun sahat tu na bidang. Pola do adong dua meter, tolu meter jala ndang na binoto be toropna baion na dibau gabe sada amak. Leleng do tutu mambau baion gabe sada amak alai ala nunut pambau manjadi do ulaonna gabe sada amak tiar.

Sandok pandohan nunut ima patuduhon halak na lohot tu ulaonna, nang pe rundut, godang siradotan jala hira naso marhaujungan di mulana alai naso jadi tadinghononna ulaoni sahat tu nasidung dibaen.

Adong do pandohan ni halak Batak na mandok: talu gogo binaen ni nunut. Patuduhon adong do halobian ni halak na nunut. Adong do antong mangulo songon sisia gogo, ala togos pamatangna, hatop mulalaulaon. Alai sipata marnaloja do pamatang ujungna terbatas do gogo. Halak nanunut, sai diuduti ulaonna, sahat tu nasidung. Toho ma tutu talu gogo binaen ni nunut, ai gumodang diula halak na nunut martimbangkon dongan sisia gogo nangkin.

Dongan panjaha di partingkian nuaeng sai hira na diolgab jaman on do hata nunut sian pangalaho ni jolma songon parmago ni pambau. Ai so jumpang be lage manang amak na dibau alai amak parbue ni masin nama. Boi do hira na tartading tutu pangalaho na nunut nuaeng di jaman digoari do "serba cepat", "serba instan" jala sai hira na sihudus di angka ulaon niurupan ni tehnologi. Alai manang boha pe pangalaho na nunut sai tong do dihirim sian hita di partingkian nuaeng. Molo diparkarejoan paberik boi ma tutu hira mago pangalaho na nunut, alai diangka ulaon na asing isara ni pande bagas, peneliti, pagula (petani), panurat, pangajari dohot na angka debanari sai tong do ingkon nunut.

Tarbarita do pandohan ni halak Batak na mandok: "nunut siraja ni ompuna", halak na sai lohot diulaonna tongtong manguduti ulaonna sahat tu na sidung ido halak na marnampunahon haulion dohot parbue ni ulaonna.

Tabe:

Pdt Nekson M Simanjuntak