HINSA; Pangalaho Sipujion di Parkarejoan - 5

 Pangalaho Sipujion di Parkarejoan - 5:

"HINSA"

  

Ganup jumpang perayaan 17 Agustus, sai dipamasa do di parsikolaan manang di huta pe ima na ginoaran lomba manang pertandingan pe. Adong lomba lari, lomba manjangkit bona ni pining, lomba mangallang karupuk, lomba manghunti botol, lomba mamboan kalereng di sendok, dohot angka lomba na asing. Ribur ma idaon jala dapot pujian angka na monang di parlombaan i tamba ni angka upa hamonanganna. Ribur ma tahe idaon hinsa jala marsiadu asa haru monang.

Songoni ma masa hariburon dung adong parningotan Hari Kemerdekaan di bangso Indonesia. Aha do domu ni parlombaan tu pandohan hinsa?

Nuaeng tapaihutihut ma pangalaho sipujion na palimahon ima "hinsa". Hinsa boi ma talapathon songon na didok hata Indonesia: "lincah" dohot "cepat". Songon lomba na ginoaran nangkin: angka na dapot juara ima angka na parjolo sahat, tandi humatop ibana jala boi manaluhon donganna. Hinsa tarpatudos doi songon hatop ni parlojong ni hoda si hapas pili, hatop jala hojot ndang taradu hoda na asing. Pandohan hinsa ummura do lapataonon tu halak na marsiadu isara ni lomba lari. Tontu di parsiaduon, ise halak parjolo sahat ido juara monang. Halak na huminsa, tandi ibana dijolo manaluhon angka donganna.  Molo di parkarejoan, hinsa ima sahalak na sigop jala hatop mulaulaon. Ndang hea marnalemba, ai hira ila bolon do di ibana molo parpudi sidung ulaonna. Alai nang pe hatop tongtong do denggan jala marture angka na niulana. Sahalak na hinsa sai tandi parjolo sidung ulaonna, angkupnii sai umbidang do nang lupak na kinarejoanna sian donganna.

Paduahon, asa ummura atusan taringot tu pandohan hinsa, taingot ma tingki panortoron. Molo diida parhata songon na lambat pargocci dohot lemba angka odoran ni panortor, pintor didok ma: "tapahinsa!". Dung i sigop ma pargocci mamalu doal na humatop dohot musik gumirang. Suang songoni ma nang angka odoran ni panortor dipahinsa ma urdot ni panortorna hombar tu musik i. Adong do dison na uli, nang pe hinsa panortor i, alai ingkon saurdot do tu tektek ni pargocci. Ai ndang masa hinsa musik alai lambat panortor, manang sabalikna hinsa panortor alai lambat musikna. Hinsa di panortoron ima saurdot musik dohot panortor, ujung na uli jala renta idaon.

Patoluhon, pandohan na hinsa di pangulaon boi ma tarida tingki ulaon di sada huta mangula sada ulaon. Nunga adong bilangbilang torop ni halak dohot tingki pangulaon. Asa humatop nasida mangujungi bogasna, pintor didok ma tapahinsa da. Manang di tingki mangula, adong dope bogasna hape diida ma nunga ro samon na mandok naeng ro udan, ro ma angka pangulai mandok tapahinsa asa jolo sidung andorang so ro udan. Songoni ma nasida marsitutu hinsa di pangulaon asa tumibu sidung ulaonna.

Paopathon, hinsa boi do tarpatudos tu halak pardalan manang pangalapi. Molo matua natuatua sai adong do na ginoaran pangalapi, angka ise na patut sitopoton keluarga ni na monding i borhat ma pangalapi paboahon na masa, jadi ingkon honsa do pangalapi, molo ndang, ndang sangat bangke i dibereng ro na nialapan. Di huta nami di Tano Tombangan adong do na ginoar huta Sipotangari, tingki so une dope dalan songon si nuaeng, holan mardalan par dope tusan. Jadi ganip borhat tu hutai sahat ma potang ari, gabe digoari ma mamhutai Sipotanari. Alai hea do masa pangalapi tu hutai nunga sahat andorang sopl potang ari, ala hinsa pangalapi mardalan.

Palimahon, hinsa ima pangula na hatop mangula jala gira sidung ulaonna dohot denggan tandi sian pangulaon ni halak na asing. Aloalo ni na hinsa ima "humarojor". Humarojor lapatanna hatop alai ndang tontu ulaonna. Ingkon loja dope halak paulihon bogas naung niulana. Hatop do nian suruon alai jotjot tarhirim halak na marsuru ibana ai ndang songon na hinirim ni roha parbue ni na diulana. Alai molo didok tu sahalak pangula na hinsa ima halak na dipillit tu ulaon na tontu ala dihaporseai boi do ulahononna dibagasan tingkin na jempek, hatop jala diula sadenggan ni dengganna. Pangulaon ni halak na hinsa ima di ginjang ni gogo ni pardosdosan ni torop halak. Molo pardosdosan boi diula sahalak sarante sadari alai molo sahalak na hinsa boi do tolu rante dua ari. Songoni ma parbue ni halak na hinsa, tandi humatop mangula di parkarejoanna sian na asing jala denggan parbuena.

Halak na hinsa sai dipartugan halak do molo masa marsiadapari, ai taruli do angka donganna mandongani ibana. Tung subang bolon do di sahalak na hinsa ulaon na marlembalemba. Dongan panjaha, adong parhusoran na masa di bona pasohit, diulaon ada manang diulaon di juma pe. Molo masa adat di huta laos parhutai do parhobas na mangaradoti ulaoni, alai oarpudion nunga disewa be parkatering laho siparsaulihonon ni situan mangorop. Suang songoni nang ulaon di hauma, nunga hira sude dipaborongkon, mangombak balik marhute jetor. Suang songoni uju masa gotilon nunga dipaboronghon tu halak sian na manabi, mamanting sahat tu na sahat eme di jabu. Ai marsiadapati do halak Batak andorang so ro hamajuon on, alai nuaeng nunga dipaborongkon manang dipagajihon pangulaonna.

Tontu, masa parhusoran ala ni hamajuon doi dohot pangontak ni "komersialisasi kerja" do ra, nunga maretong halak digogona dohot na niulana. Hape hasomalan di halak Batak ima marsiadapari, masiurupan jala marsingkat soring di na laho mangula. Masa borongan manang dipagajihon di parpudion tontu ala naung maol do dos tahi laho marsiadapari, ai boi masa tutu holit di gogona molo mangula tu hauma ni donganna, hape di tingki ulaon di ibana naeng ma hinsa angka donganna. Ujung na gabe masa ma angka borongan manang dipagajihon. Ia tondi borongan manang dipagajihon ima disuhat ma sadia bidang siulaon i dohot sadia asam ni hepeng na. Taringot tu hatop manang lelengna dikarejoi saguru tu pangulai ma. Halak na hinsa di ulaon tontu lam godang ma ulaonna. Lam humatop sidung, lam gumodang paruntungan di nasida.

Halak Batak tarmasuk do angka pangula na hinsa, jala hatop dohot mangadopi jaman na lam tu majuna. Ai torop do halak Batak umpuka Kongsi, CV, PT manang badan usaha na asing laho marsiadu mambuat program pembangunan na pinamasa ni pamarenta nang suasta pe. Ai ndang binoto be sadia godang halak Batak Pamborong nuaeng on, di Bona Pasogit manang di parserahan pe. Tahalashon doi, ala ido na masa di hamajuon ni jaman on. Lam hatop jala hinsa halak mangihuthon hamajuon ni jaman, lam pasidohot mamutihi paruntungan manang parsaulian ala ni hamajuon.  Alai tutu dipaingot hita marhite pangalaho sipujion na hinsa, ndada holan mangadu paruntungan, alai patuduhon pangulaon sipujion i do songon dia ma hita di parkarejoanta be hatop mulaulaon, unang lemba jala bonsa alai naeng ma hinsa. Sahalak na hinsa boi hatop sidung ulaoni jala ture nang parbuena.

 

Tabe

Pdt Nekson M Simanjuntak