MARGOGO IJUR BARI (Jamita Sipodaon sian Halak Batak Taringot Tu Kerja Keras)

 MARGOGO IJUR BARI

(Jamita sipodaon sian halak Batak taringot tu Kerja Keras)

  

Na di ari Rabu, 1 Februari 2023 na salpu, borhat do hami dohot inong rap dohot abangku, ibotongku nang ang bereku tu Lumban Muara Pahae, Huta Onan Joro di luat Pangaloan Kecamatan Pahae Jae dalannami martaon baru dohot mangido tangiang sian ompung dohot angka tulang asa tiurtiur hami angka pahompuna/berena na diparserahan, asa jumpang najinalahan jala dapot na niluluan.

Mansai ringgas do roha tu Pahae on marningot burju ni imoungku. Uju mangolu dope ompungku doli ima Ompu Virji, sai diboan bapa nahinan do hami tingki libur sikola. Ringgas do roha tu Lumbanmuara on ai pittor niingot ma tabo ni na maraek rangat. Apala di pudi jabu ni ompungi adong paridian aek rangat (air panas). Tarbarita do luat pahae na godang air panas na marbullakbullak na haruar sian toru ni tano. Jala parpudion nunga jongjong sada parusahaan listrik sian na mamangke panas bumi na ginoar mai geotermal ima PT Sarulla Operation Ltd.

Mulak ma carito on tu ompungku. Uju di ngoluna na ringgas do ompungku mangula, sipata diboan do hami dohot tu hauma. Disi ma binoto na adong air panas, boi masak jagung manang hassang dibaen ala ni mohopna. Di piga juma adong do jumpang i luat Pangaloan sahat tu tingkion.  Na ringgas do ompungku mangula, nang pe naung marumur pitupulu taon ompungku hira talu do angka sundut naumposo. Sogot dope manogot i nunga borhat ibana tu hauma laho mangula, sipata mangguris hapea jala molo nunga jumpang ari onan mangalanja hapea ma tu onan asa adong manuhor boniaga sian onan. Angkup nii olo dope lao marhaminjon rap dohot donganna.

Marningot pangulaon ni ompung i gabe huingot ma pandohan ni halak Batak: "margogo ijur bari". Aha do na didok margogo ijur bari? Molo didok margogo ijur bari ima sasahalak na borhat mulaulaon so jolo sarapan manang mardaon pogu. Male dope siubeon disi dungo sian podomanna nunga borhat manopot ulaonna. Baribari dope pamangan jala ndang adong dope dipangan manang diinum manang aha, alai nunga ingkon mangula. Margogo ijur bari, lapatanna ndang adong dope ijur na diharuarhon sian pamanganna di manogot di ari, baribari dope pamangan nunga pintor humalaput laho manopot siulaonna. Songon na taboto disi dungo tontu baribari do pamangan, ingkon jolo minum aek do baru pe songon na tabo panghilalaan.

Margogo ijur bari ima manggombarhon sahalak na sogot manogoti borhat mulaulaon isara tu juma laho mangula ulaonna manang matigatiga manang marboniaga tu onan. So binsar dope mata ni ari di manogot ni ari nunga borhat laho mangula siulaonna. Amang tahe, ninna roha songonima angka natuatua borhat manjalahi parbodarian.

Margogo ijur bari laos digambarhon i do parsitutuon mangulaulaon. Dirajumi ibana godang ni siulaon alanii ingkon dipangke tingkina saboiboina asa boi diadu sude angka siulaonna. Margogo ijur bari ima patuduhon hinaloja ni natoras manghapadothon ulaonna mansari asa adong parbodarian, asa boi laho parborhathon ianakonna marsikola laho mandungdung sitasitana. Dung magodang dakdanak, dipodahon ma tu angka anakhonna asa diingot natuatuana na margogo ijur bari laho marmudumudu sude angka gellengna.

Tontu nunga nania toropna hasea halak Batak ala ni parsitutuon ni na toras pinaborhat ni tangiang dohot margogohon ijur bari. Patut do hangoluhononhon tung na so boi neang jala langgus roha marnatuatua, baliksa ganup anakhon naeng ma mambaen na denggan tu natorasna. Nang pe ingkon okuhononta, tung so tarbalos do pambahen ni natuatua maradophon gellengna, alai molo pantun di ngolo jala ingot dipoda nunga sumuang panghilalan ni natoras naung loja marmudu anakhonna. Ai molo tung hasea jala tarpasupasu be nuaeng tung ala na mangasi do Debata di tangiang ni angka natuatuai.

Taingot ma jamita sipodaon on, naung margogo ijur bari do angka natorasta be laho pasingkolahon angka gellengna asa hasea. Patut mandok mauliate hita tu Debata marhite na lam pantun di ngolu on, ringgas marminggu jala parhuria. Ingot di angka poda jala unang jais.