MANGGUGUT SIRA: Manghasabamhon Ngolu

 MANGGUGUT SIRA

(Jamita Manghasabamhon Ngolu)

 

Na diari Minggu 29 Januari, marhuria do hami tu HKBP Cianjur, dalan mandaoni nasida ala na hona lalo luat i di tanggal 21 Nopember 2022 na salpu huhut pasahat sipir ni tondi sian angka pelean i huria tu nasida. Ia turpuk jamita disi ima parsorion ni si Job. Toho ma na porsea si Job jala tanda ni haporseaonna ima satia di las ni roha dohot arsak ni roha. jala tongtong mamuji Debata di tingki dapotan las ni roha nang di tingki agoan las ni roha. Ai suda do sude arta ni si Job ala ni ujian i, jala didok ibana: Debata mangalehonsa, Debata na mambuatsa pinuji ma Tuhan i. Di hasatiaon ni si Job i, diapuli jala didaoni Tuhani do ibana ai ditumpalhon Debata do tu si Job silompit ganda singkat ni naung magoi.Laos ni ondolhon do di jamita i paboa ganul na porsea ingkon rade manahan di hapaeton ni ngolu. Songoni dia pe pogosna hita nang pe soada manang aha di hita ingkon tongtong satia tu mamuji Debata.

Adong do sada pandohan ni halak Batak manghombarhon hapogoson ima, "manggugut sira". Lapatanna mangan holan mardonganhon sira soadong lompanna. Nang pe so adong manang aha lompan dongan ni indahan sipanganon di jabu boi do sonang sada ruma tangga nang pe holan manggugut sira. Molo mangan sasahalak manang saruma tangga tohomai somalna adong indahan, sayur dohot lompanna. Ido tutu na ideal songon na disosoan ni pamarenta ima: empat sehat lima sempurna. Alai jaman nuaeng mai, di na lam tamba maduma ngolu ni halak Batak. Molo mangan disi ma indahanna, lompanna, sanyurna tamba ni minum susu. Alai dijaman ni hapogoson boi do masa ombasna ndang adong manang aha, ai holan sahali saminggu do onan, jala panuhoran ni gulamo pe ndang piga ujungna mangan ma so marlompan ima naginoar manggugut sira. Ndang ditanda minum susu na adong ima purik. Purik ima aek ni pangalompaan ni indahan, dung gura indahan na dilompai dihatiar ma indahan na dihudon i, dungi dibuat ma huanai dibaen tu mangkuk dungi dibaen sira otik ima diinum jala dihalashon.

Manggugut sira ima mangan so pola marlompan. Holan indahan i sambing do ditamba sira saotik. Dung disendok indahan tu piringna, dicuculi ma tanganna, dungi disurdukhon ma tanganna tu parsiraan. Lohot ma angka bunga ni sirai tu tanganna dungi diguluhon mai tu indahan na dipiringna. Dungi dipangan ma indahani. Ima na ginoar manggugut sira.  Ra ndang adong be na songon i halak Batak nuaeng, mangan marhite na manggugut sira. Molo adong na songoni patut do manetek ilu, ai tung gombaran ni hapogoson ma tutu. Jala sian na binoto nunga adong program ni pamarenta asa mengantisipasi na hurang giji.

Sabalikna do anggo nuaeng na jotjot niida, ima: godang marlobolobi sipanganon. Dibuat mansai godang indahan nang lompan tu piringna hape ndang suda gabe godang ambolong. Ima sambor ni hadumaon nuaeng di na deba tarlumobi ma diangka pestapesta ni halak Batak, suksuk sipanganon jala ragat massamna. Angkup nii, molo ujui tangis do ala so adong sipanganon, alai anggo nuaeng godang na tangis dakdanak ala sai dopaksa natorasna asa mangan. Disiuksiuk anaknai jala dipopai asa olo manganhon indahan. Ra ndang adong be na manggugut sira diparmanganan siganup ari di tongatonga ni halak Batak. Tahalashon ma tu Debata parasirohai na mangelehon pasupasuna tu hita. Amen