RADOT: Pangalaho Sipujion di Parkarejoan - 3

 Pangalaho Sipujion di Parkarejoan - 3:

"RADOT"

 

Horas ma di angka dongan Panjaha di Media Sosial FB on, nunga niarbis adong pitu pangalaho sipujion di parkarejoan manang na tagoari etos kerja na adong di halak Batak. Parjolo nunga pinaandar: ringgas, paduahon: nunut. Ombas on niuji ma muse na patoluhon ima: radot.

Dung masuk hita tu pangalaho na radot, gabe huingot donganku sakalas tingki masuk tu STT HKBP taon 1991 na margoar si Radot. Tingki tingkat sada rap do hami sakamar di Barak E, jala di tingkat tolu sahat tu tingkat opat rap kost do hami di Jl.Linggarjati Pematangsiantar, adong lima halak hami na kost disi.  Sian piga hami donganna na sakalas hira sapandapot do paboa songon goarnai do nang pangalahona. Radot ibana di angka siulaon. Sogot dope manogoti nunga manapu ibana paias kamarna, tung so boi do idaon nion orbuk di bagas, ndang hea tarlambat tu kalas, suang songon i tingki pasahat tugas tu angka dosen. Jala molo ari Sabtu pintor parjolo do on manussi paheanna, aksi do halakna jala ias.  Dung botari borhat ibana margurende rap dohot naposo bulung di sada huria na jonok sian kampus. Tardok, hira sude do ulaonna diula ndang adong na tading, ndang hea sisurahan ulaonna,  ndang hea tarela ibana di parange nang di angka tugasna. Sandok singkop do pangulaonna ala diradoti ibana do nasa na ringkot di parsikolaan, di asrama nang diulaon na asing di duru ni kampus pe.

Dongan panjaha, sude ra hita sapandapot tung pangalaho sipujian do di parkarejoan sahalak na radot diulaonna.

Bidang do na hinangham ni pandohan

"radot" di halak Batak. Radot boi do dipangke gabe hata pangalaho (kata sifat), jala boi nang hata pangulaon (kata kerja). Radot hata pangalaho (sifat) ima sasahalak na mangantusi ulaonna, diboto sian dia jala aha ujung ni siulaonna, jala diboto ibana muse angka aha na ringkot manang na porlu tu nasa siulaon i asa marujung dohot denggan. Angkupnii  halak na radot boi ditanda ibana ise halak sisuruonna asa marture ulaonna.

Molo hata pangulaon didok ma: "mangaradoti". Pandohan mangaradoti nunga dihamhami sude mulai sian sangkap mangarangrangi (perencanaan), pangulaon  (implementasi monitoring) sahat tu na mambaen rujiruji (evaluasi) tu na niulana. Boi ma dohononta ia ulaon mangaradoti dihamham i do sude ulaon sian mulana sahat tu ujungna asa marture. Aha na ringkot diulaoni dohot angka ise sisuruon na patut patupa ulaon i.

Nijaha di google songon: "Arti bahasa batak radot adalah mangaradoti, mengawasi, menyimak, memperhatikan, mematuhi misalnya perintah, menekuni, mangaradoti ulaon, menekuni pekerjaan. radot di, tekun, rajin, seksama terhadap." Molo talapathon pangantusioni ima mangaradoti, mamparateatehon, mangoloi parenta, mangulahonsa ulaonna marhite na radot, nunut, ringgas jala ndang adong na tartading.

Boi do tagombarhon pandohan "radot" on tu sahalak parhauma. Molo borhat sahalak tu hauma diboto aha do na naeng siulaonna, alat aha ma na naeng siboanonna jala aha bohal siboanonna jala ise donganna asa boi marujung ulaoni. Sude i diparade asa unang tarsabat ulaonna.

Pandohan mangaradoti boi do tong tarpatudos hita isara halak Batak naeng marulaon adat, adong parnonorna jala adong tingki marria raja.  Sahalak parhata na manguluhon pariarajaon, ingkon nonor do dituturi aha do goar ni ulaoni, andigan, didia ulaon i, sadia sinamotna, songondia juhut sipangkeoan, sadia torop gokhon, ise parhobas, angka ise horong ni hulahula, tulang, bona tulang, piga ulos jala ise manguloshon, panandaion ise na manjalo jala ise na pasahathon dohot angka haporluan na asing sahat tu ujung ni ulaon i. Tung sude ma tahe dinonori aha siulaon, ise na martugas tusi jala bohal nasida. Dung masa ulaon i renta ma sude tutu jala mardalan dohot denggan ala nunga diradoti saluhutna.

Halak na radot, ingot doi diangka siparadeonna, ndang muramura lupa. Ai olo do tutu halak marria raja, dinonori angka ulaon alai lupa diangka naung dihataan. Adong do pandohan ni halak Batak mandok: "hora do ihot ni doton, hata do siingoton." Patut do tutu adong di halak Batak "ingotingot" asa ingot di angka haputusan ni rapot dohot turgas ni angka siradotan di ulaon i.

Halak na radot marture do ulaonna, dao ma sian parungutunguton ala ndang adong na tartading. Halak na radot dapot pujian ala denggan ulaonna. Molo tung adong na tading pintor parnolo ibana mangalap hata jala mangido sala asa marpamuati roha ni na deba.

Songoni do hita dipartingkian nuaeng di parkarejoan, isara di: kantor,  di punguan, di masyarakat dohot di bidang aha pe i. Naeng ma radot ai parsaulian bolon do sahalak na radot diulaonna, ai marture ulaonna jala renta saluhutna. Sipujion do ibana ai tung mangurupi situtu ibana di inganan parkarejoanna. Sai ditugan torop halak do tu halak na radot mulaulaon, angkupnii porsea jala haposan halak pasahathon ulaon tu ibana. Halak na radot ditugan halak doi diulaon na metmet sahat tu na balga. Ai adong do halak naeng mamparsinta ulaon na balga, hape ia ulaon na metmet pe soboi diradoti ibana.

Siandia do mulaanta laho mangarade diri asa radot. Nuaeng on digoari ma: "manajemen" manang boi tadok pangulaon na tota jala pita. Tamulai ma sian dirinta, isara diulaon di bagas dohot ulaon na metmet di hita.

Suharsuhar ni halak na radot ima raus. Raus lapatanna ndang martanggungjawab diulaon, neang rohana jala ndang martontu ulaonna. Diula do nian alai asal diula digoari mai "sipaula". Halak na raus  ima na langgus: denggan manang so denggan ulaoni hira na so dipardulihon. Marparbue manang naso marparbue na diulanai, ndang adong tanggungjawab. Jotjot do halak tarhirim diparbue ni ulaon ni halak na raus, pola tahe gabe parsahalian. Halak na raus olo do mangundukhon ulaon hape ndang diula, girgir mangoloi alai bangkol mangulahon. Tung na so tartugan do dihalak Batak halak na raus diangka siulaonna alai halak na radot parohon parsaulian di parkarejoanna.

Pangalaho sipujion do halak na radot di parkarejoanna, ndang olo tartading ulaonna, jala diboto aha ulaonna sahat tu na paujungkonsa. Tung dipataridahon halak na radot do tanggung jawab, hira ila bolon do di ibana molo tollang jala tarsabat ulaonna.

Sai jumpang ma pangalaho na radot sian angka anak dohot boru ni halak Batak di nasa ulaonna, di kantor, di usaha, di jabu, di parsikolaan, di partigatigaan manang usaha pe dohot ragam sihobasan di tongatonga ni masayarakat.

 

Tabe:

Pdt Nekson M Simanjuntak