PADOT: Pangalaho Sipujion di Parkarejoan - 4

Pangalaho Sipujion di Parkarejoan - 4:

"PADOT"

 

Molo di Jakarta adong do lapo na margoar "Marpadot", tabo do tutu lompalompa nasida jala nunga tarbarita ro didia. Nunga pigapiga hali mangan di lapo i jala sihol do roha mulak mangan tusi ala tabo. Tingki manggurithonon on gabe tubu do tu rohangku mandok goarna ma daina, parbue ni padot ima las ni roha tu halak na asing. Olo nama sungkunon saulahon parlapoi boasa tutu marpadot goar ni lapona. Ai sun nama tabona pola torop marjanji mangan tu lapo marpadot i.

Mulak ma hita tu bona ni panghataion on, andorang soi nunga pinaandar tu hita tolu pangalaho sipujion: ringgas, nunut dohot radot. Nuaeng tauji ma patoranghon pangalaho sipujion di parkarejoan na paopathon ima padot. Songon dia do sasahalak ginoaran na padot? Aha parbue niulaonna jala songoni dia ibana mangulahon ulaonna?

Andorang so pinatorang taringot tu pangalapation pandohan na "padot" tu hita, lao majo hita marsirarion di huta ujui. Andorang so tatanda televiso adong do hasomalan ni ina ni halak Batak di huta, ima: marnonang di balatuk manang di alaman. Somalna sidung mangan borngin i marpungu ma dua manang tolu halak ina hundul di balatuk ni jabu, marsirarion nasida taringot tu ulaon masa di huta.manang di balian. Lam uli ma muse molo toho di rondang bulan, tiur idaon torop halak marmeam dialaman. Dakdanak marlojongi dialaman, naposo margitar huhut marende i. Di na hundul angka ina marnonang angka barita na masa. Molo adong sidohonna tu ina na asing disuru ma anakna laho manggora asa ro rap hundul nasida marsirarion. Molo lam tamba nasida ndang tuk be balatuk inganan ni hundulan nasida gabe tuat ma nasida hundul tu alaman. Pintor une doi masiboan hundulanna be marhuliang marnonangi adong doi sian batu, adong na mamboan soban gabe hundulanna. Tarsongoni dope jamanna, ai dijabu pe so adong pola lo rohanasida ai so adong sitontonon dijabu isara ni TV nuaeng.

Sian na marnonangi jumpang nasida do angka barita na masa diluati, nunga ro didia ulaonna di hauma jala na deba olo do manaringoti angka gellengna: anak parumaen, boru hela manang pahompuna na di pangarantoan. Deba ina na marnonangi olo do diboan hajutna bohal laho marnapuran, molo suda napuranna manang gambirna olo ma dipangido sian ina na asing. Di parpunguan sisongoni na deba ina adong do na mamboan sibauonna dohot angka baion asa sambil marnonang huhut mambau ibana, nangetnannget dibau tutu asa sidung hajutna manang tandok na dibauna. Songoni ma ina ni halak Batak marnonangi di balatuk manang di alaman jala di marnonangi sai adong ina na padot mamparhaseang tingki songon ina na mamboan sibauonnai.

Nuaeng tubu ma sungkunsungkun, dia do domu ni na marnonang, marsiraion angka ina dohot pandohan na padot? Ida majo angka dongan, na naeng pataridahononhu ima sian hasomalan ina na hugoari di ginjang i adong do halobian ni ina asing ni na marnonang i, ima ina na mamparhaseang tingki, ndangnlaos habis tingki marnonang sambing alai diboan do sibauonna. Ndangbtading ibana sian donganna alai adong halobianna sian na asing ai sidung do sibauonna. Sada contoh doi paboa gombaran ni sahalak na padot ima mamangke tingki asa marparbue ulaonna.

Nuaeng masuk ma hita tu pangalapation na umbagas. Hupareso di Kamus Batak, adong piga pandohan na dihonahon mangalapati hata "padot", ima: telaten, rajin, ulet, gigih, kerja keras, tekun. Sian godang ni pandohani dipataridahon i do mansai bidang do hinangham ni pandohan "padot" gabe ndang boi lapaton tu sada pandohan. Alanii taputihi ma angka piga na boi honahononta tu pangalapation na padot, ima:

Parjolo, molo padot sasintongna ima pangalaho sipujion domu tu pamangkeon ni tingki. Halak na padot nunga mulai karejo andorang so ro dope donganna. Molo halak mulaulaon olo tarlambat alai molo sahalak na padot tung so olo tarlambat baliksa andorang so ro dope donganna nunga parjolo ro ibana manopot ulaonna. Suang songoni parmulakna, molo halak humarojor naeng mulak manadinghon bogasna alai halak na padot jolo dihudus do mangulaulaonna asa sidung bogasna.

Halak na padot ima ndang holan ulaon na pokok diula, saboiboina diradoti dope angka ulaon na marguna na asing so pola tading ulaon na parjolo. Molo halak na somal pintor hobas do naeng mulak ala bot ari nang pe tollang karejona. Alai halak na padot nang pe naung tingkina mulak ala bot ari, molo tollang saotiknari ulaoni, rade do ibana paujunghonsa baru pe asa mulak.

Pangantusi na paduahon domu tu pangalaho na padot boi do tong tapadomu tu hadirion na uli. Sahalak na padot ima mangulaulaon so pola ingkon babaan, alai nunga diboto ibana dia ma na une siulaonna. Adong do tutu parkarejo jolo dibabaan asa karejo, jala nunga dibabaan aha siulaonna alai tong ndang mangantusi diulaonna. Dao ma na songoni ate.

Sahalak na padot, bulus do rohana mulaulaon so pola babaan. Angkup nii nang pe ndang adong indukna matamatai ibana hot do diula ulaonna dohot denggan. Olo do tutu halak parkarejo ingkon dimatamatai, molo disi indukna hira dipataridahon bohina di ulaonna. Alai dung holip sian indukna manang sian mandorna gabe ditadingkon ulaonna. Di halak Batak pangalaho si songoni digoari mai "suruon lombu", ingkon jolo disi do paninggala jala lohot batahi baru pe olo mulaulaon. Tung sipadingon do pangalaho suruon lombu sian halak na padot.

Padot ima halak na tongtong mangulaulaonna so pola disuru, hot mangula ulaonna so pola dimatamatai, tongtong diparhaseang tingki nang pe so disi induk manang halak na marsuru ibana karejo. Halak na padot ima halak na tau haposan, jala sai dihalomohon halak do on di angka ulaon di hauma, di huta nang di angka paradaton pe.

Patoluhon, pandohan padot on domu pamangkeon ni tingki tu angka ulaon na marguna so pola mangganggu tu ulaon bona. Molo lao ibana tu hauma dipahatop ibana mardalan asa gumodang tingki mangula. Molo dung mulak sian hauma, molo so adong siboanonna disorohon do masihappa manang mambuat andor asa adong lompaon tu pinahanna. Molo mulak ibana ndangbadong sibuanonna, tung dihalaputi do mambuat soban, dungi dihunti mai ai tung tarhilala do pagalak api. Halak na padot ndang olo masineang manang padenggal gonting mulak sian ulaon alai sai adong do na tubu tu rohana mambaen na marguna.

Paopathon, halak na padot ndang holan di ulaon di parkarejoan, alai tarida do nang di bagasna. Tung ias do bagasna jala alamanna pe ndang marduhut. Molo ulaon di huta pe rupani, sahalak ina na padot, naeng borhat tu pesta, paimahon dongan na ro, dang hundul on manang marngutungut ala so migor ro dongan na i. Alai dipareso do aha na ringkot, isara na: tes dijabu, molo kosong serepna disangahon mangalompa. Molo nga otik mualna disorohon mangalap mual. Andorang so borhat sian bagas na denggan di kunci bilutna, molo abit na di jomuran di buat manang ditonahon tu halak betak ro udan andorang so mulak ibana. Halak na padot ndang hea taryading ulaonna, baliksa mareagam dope na boi diula mamparhaseang tingki.

Martua do halak na padot ai angka parsauliaan do parbue ni tanganna dohot parkarejoanna. Tagamon do nuaeng sian angka anak dohot boru ni halak Batak na padot? Molo miduk angka na pistar jala parpangkat nuaeng halak Bagak na karejo di pamarenta nang di suasta pe tontu parbue ni pangalaho na padot doi. Jala laos tasosoi ma asa padot bangso Batak di nasa ulaonna.

Tabe.

Pdt Nekson M Simanjuntak