PANGALAHO SIPUJION DI HALAK BATAK MANGARADOTI PARKAREJOAN - Etos Kerja Orang batak Dalam Pekerjaan

PANGALAHO SIPUJION DI HALAK BATAK MANGARADOTI ULAON

(Karakter - Etos Kerja Orang Batak Dalam Pekerjaan)

 

Di taon 2013, tingki mangula hami di Biro Pembinaan ni hurianta HKBP niontang do amanta Jansen Sinamo patupa parguruan angka pandita asa marnampunahon "etos kerja". Nunga tarbarita amanta Jansen Sinamo on na mamodahon pangajaran taringot tu etos kerja, digurithon ibana doi di pigapiga buku jala mansai jotjot patupa angka pelatihan manang pembinaan di sandok Indonesia, di ulaon ni pamarenta nang swasta pe. Gabe tarbarita do amanta Jansen Sinamo guru pangajari etos manang "guru etos nasional." 

Niririt ma 20 halak dongan pandita na nirajuman bolas mandohoti pelatihan i asa marguna dipanghobasionna di huria nang masyarakat pe. Tabo do amang Jansen Sinamo mangajari, godang tudosan dohot angka turiturian na pinapunguna na tartait tu roha asa tung lam marsitutu mangulahon ulaonna. Marpanghorhon do pelatihani ai tarida do parbuena, ai mansai denggan be do barita nasida di angka ulaonna di huria sahat tu tingki on. Dungkon tinanda amanta Jansen Sinamo marhite Etos Kerja i, gabe sai solot do di roha laho mamutihi angka poda, pandohan, pangajaran manang pangalaho ni halak Batak tarongot tu ulaon. Molo etos kerja boi do marrumanghon "spirit" (semangat) manang partondi na girgir mulaulaon. Boi muse do mardomu tu bakko manang na ginoar mai "karakter".

Dison huuji manggoari etos na marisihon spirit dohot karakter i gabe pandohan "pangalaho sipujion taringot tu ulaon di tongatonga ni halak Batak". Molo didok pangalaho sipujion tontu tarida ma disi pangalaho nauli mulaulaon jala na marparbuehon na denggan di ragam ni ulaonna. Dungkon tinanda amanta Jansen Sinamo marhite Etos Kerja i, gabe sai solot do di roha laho mamutihi angka poda, pandohan, pangajaran manang pangalaho ni halak Batak tarongot tu ulaon. Molo etos kerja boi do marrumanghon "spirit" (semangat) manang partondi na girgir mulaulaon. Boi muse do mardomu tu bakko manang na ginoat mai "karakter".

Angka piga pandohani diputihan ma jala sadasada sai nisosoan do tingki marjamita. Anggiat tading di roha ni anhka na umbegesa. Nuaeng hugurithon ma muse tu hita. Adong pitu pandohan ni halak Batak na patuduhon pangalaho sipujion ni halak Batak maradophon ulaon, ima:

1. Ringgas,

Ringgas ima patuduhon haradeon ni roha tu ganup ulaon. Hira sude do ulaon di didohotan, ndang hea tartading: di ulaon las ni roha nang arsak pe, diulaon di huta nang di balian pe. Ndang hea manjua tingki disuru alai rade tongtong tingki sadihari pe. Sahalak na ringgas mulaulaon dirajumi ulaoni songon tanggung jawabna. Ndang na pola diigil ibana parsaulian sian i ala hira panjouon do dirajumi ibana ulaon i.

2. Nunut,

Pandohan nunut ima na sai tongtong diuduti ulaonna. Godang siulaonna alai sai tongtong diulahon. Nang pe hira na rundut dimulana so binoto ujungna alai gabe boi do marujung dohot denggan.  Tarpatudos do pandohan njnut on tu pangulaon ni parhauma (petani), partonun (tonun) manang pambau (pature amak).

3. Radot,

Radot boi do dihata Batak songon hata pangalaho (sifat) alai boi do hata pangulaon (kerja). Radot ima halak na mangantusi ulaonna, diboto sian dia jala aha ujung ni siulaonna, jala diboto ibana muse angka aha na porlu tu nasa siulaonnai asa marujung jala boi ditanda ibana ise halak sisuruonna asa marture ulaonna. Molo hata pangulaon didok ma: "mangaradoti". Pandohan mangaradoti nunga dihamhami sude mulai sian sangkap, pangulaon dohot na mambaen rujiruji tu na niulana.

4. Padot,

Pandohan na padot mardomu doi tu pangalaho ni sasahalam na mamangke tingki. Diparhaseang tingki hombar tu pamangkena. Olo do tutu raus halak di pamakean ni tingki, didok mulai karejo pukul 8.00 hape ro pukul 10.00. Manan ditahi marujung pukul 18.00 hape so dapot dope tingkina nunga mansohot. Halak na padot ima dipangke jala diparhaseang tingki sadenggandengganna pasidungkon ulaonna.

5. Hinsa,

Hinca boi ma talapathon songon na didok hata Indonesia: lincah. Sigop manang hatop mulaulaon jala marture na niula. Hinsa dipatuduhon i do nang parbue ni ulaonna na hatop jala denggan. Adong do hatop alai humarojor gabe ndang marniula ulaonna. Alai molo hinsa ima hatop sidung jala uli. Songon panortor, molo sai marlembalemba parnotori tingki mangaliat pintor ro ma uluanna raja parhata mandok: tapahinsa, lapatanna tapahatop, alai molo dipahatop pe ingkon saurdot do tu tektek ni gondang dohot tortor na.

6. Hobas

Sai dipabangkit halak Batak do sintua ni parhobas molo adong ulaon di huta isara ni patupa horja manang adat. Katua parhobas ima na mangaradoti angka siulaon. Balga do tanggung jawab ni parhobas diulaon adat ni halak Batak. Sahalak parhobaa diboto angka dia do une niulaon, parpeakna sahat tu parhundul ni na torop. Diboto asam ni juhut manang boras sipangkeon tu ulaon. Jadi molo digoati hobas ima haradeon ni roha mangula ulaoni jala parbue ni ulaonna ima hasonangan tu situan na torop dohot las roha ni hasuhuton.

7. Hibas

Hira sarupa do pandohan hobas tu hibas, molo hobas nangkin na martujuan sahalak na mulaulaon laho parohon las ni tu situan na torop dohot nampuna ulaon. Molo hibas ima pangalaho na gira, sigop jala hatop di nasa siulaonna. Sahalak na hibas hira marsiadu tu tingki, sotung sanga salpu tingki naung diririt dohot na dilehon gabe tarlambat ibana disiulaonna alanii ingkon hibas.

Tontu boi godang dope putihan domu tu pangalaho sipujian na jotjot dilohothon tu halak Batak taringot tu ulaon. Taputihi mai sadasada asa adong pangalaho sipujion sian tongatonga ni bangso Batak di ragam ni ulaon di partingkian nuaeng. Patut ma hita halak Batak mamangke pangalaho sipujion on di ganup ulaonta be asa tarida jala lam angur goar ni hita Batak di parkarejoanta be.

 

Tabe

Pdt Nekson M Simanjuntak