EME DOHOT SIMAREMEEME (LALANG DAN GANDUM)

Eme dohot Simaremeeme
Catatan 31 July atas berbagai rumor Penetapan KPU
Oleh: Nekson M Simanjuntak


Eme dohot simaremeeme, ima ra sada tuduson na sian Buku Nabadia na gabe gombaran na masa di situan na torop nuaeng di bangsonta. Pasimpang pasebut do barita masa andorang so masa boaboa paretongan na rasmi sian KPU, na deba mandok Jokowi do na monang, na deba nari mandok si Prabowo do namonang. Masipandok na monang na be do angka "Lembaga Survey" i hombar tu pandapotna. On do pe masa songoni ala ni lam tamba hamajuon, biar do roha ni pamarenta sotung pasual situan na torop ala ni paretongan i pola sampe ro pamarenta marhite KPI na pinaganjang Komisi Penyiaran Pers asa dipaso barita si songon i. Mangirput do angka Tivi di oraorai asa unang be dipaboaboa paretongan ni lembaga survey di paretongan ni suara na nidapotna diparsilumbaon Pilpres. Dapot ma tingki di tanggal 22 Juli dipaboa KPU ma paretongan na rasmi jala ditotophon Jokowi - JK do na monang di paretongan rasmi di pamilliton ni panggomgomi ni bangsonta Indonesia 53.15%. Alai andorang so i, dung hira dapot paretongan rasmi ala tar dua propinsinai na ma paretongan ni sude Propinsi, dibaritahon piga2 tivi do na mundur amanta si Prabowo sian sude parsirangguton ni Pilpres, jala aluhoninna ninna KPU tu panguhum. Ndang mansohot KPU diondamondami ditorushonnasida do paretongan sahat tu na manotophon na monang di paretonganna.

Ni tagam do sodung ma parsualon dungkon adong haputusan ni paretongan na rasmi sian KPU, hape marudut dope muse, ala mangadu do horong Prabowo tu panguhum na ginoar Mahkamah Konstitusi nang pe naung mundur sian parsiguluton Pilpres. mK do panguhom na manontuhon parpudi sahali di hasil ni paretongan KPU hombar tu undangundang. Ndang mulai dope manjujur angka alualu i, alai masa ma muse binege barita na lam tu jebuna ima disuan ma simaremeeme di barita alogo (jaha: situs) "dunia maya" na targoar surat kabar digital. Adong do pigapiga barita alogoi na tung mansai somal dibuha situan na torop ala sai paboahon angka barita masa di bangsonta jala dirajuji deba sai tio angka barita dapot disi. Alai dungkon ni parsirangguton ni pilpres on gabe adong na manumannuman barita alogo hira dos goarna alai baritana asing, isara dipaganda do http: www.kompas.comgabe tubu ma barita alogo sipaganda goarna: www.kompasnews.....com,www.detik.com gabe adong ma muse www.detiknews....com. tarditambatambai otik goarna manamaknamak. Songon i ma dipasumansuman goar ni barita alogoi diri manumannuman barita alogo naung tinanda ni hatoropan alai ia barita na binaritahonna tung holan sipaganda jala barita sipaototo do dibagasanna.

Tarhalomong do roha disi jala sungkunsungkun nang di roha: "ue..eee tahe, ninna roha tuang aha do nuaen niula ni jolma?" Loja ni jolma i, dipasuda tingki dohot ringgitna , ringit na holan pasuansuan simaremeeme di situan na torop, paombusombus barita alogo na so marimpola i jala pabalikbalik hasintongan. Gabe tarsunggul roha songon na dipaandar Tuhan Jesus taringot tu Eme dohot Simaremeeme. Didok di tudosan i, paboa dung disaburhon panabur i boni na denggan tu ladang i, pintor ro do bornginnai parjahat manaburhon simaremeeme. Rap tubu do duansa, tingki poso dope eme dht simaremeemei sarupa do i idaon nang pe apala tung marasing, didok sesean ma asa diloas manirang simaremeemei sian eme i, alai diorai tutu sotung tarbutbut emei alani naeng mabutbut simaremeemei. Diujungna di masa gotilon tandap mai tutu, ditutung do simaremeeme alai anggo emei dipalungguk jala dipamasuk doi tu lumbung. Boni na denggan ido na dapot tumpal.

Ua tung marsiajar ma nian hajolmaon on di tudosan na arga sian buku nabadia i, ai tung aha ma gunana holan na manaburhon simaremeeme jolmai tu situan na torop, pabalikbalik hasintongan jala patagamtagam jea? Nunga jumpang gotilon ai naung matoras do situan natorop i di barita masa nang di barita alogo pe, ai nga tau nasida mananda eme dohot simareme eme. Aut sugari ma angka boni na denggan disabur nunga lam tamba tumpalmu.

Tabe, na mauas di barita na sintong!