https://www.facebook.com/216559085082832/posts/6563843230354354/?sfnsn=wiwspmo
Kotbah Minggu Advent I, 28 Nopember 2021
Nas: 1 Tessalonika 3:9-13
Selamat Advent bagi kita semua!
Sahabat yang baik hati, dalam segala keadaan orang percaya harus menguasai hati dan tetap berusaha menghasilkan buah-buah iman sldan siap.sedia menyongsong Tuhan Yesus.
Di dalam mingi Advent ini mari kita menyongsong kedatangan Tuhan dengan:
1. Kehidupan persekutuan (gereja) yang semakin bertumbuh
2. Kasih yang semakin bertambah-tambah
3. Kuat dan tangguh dan memelihara hidup kudus
Disini saya kirimkan kotbah yang saya tulis dan dimuat dalam SP Immanuel HKBP Edisi Nopember 2021.
Hatorangan Ni Evangelium Minggu Advent I,
28 Nopember 2021
Turpuk: 1 Tessalonika 3:9-13
*MANAGAM HARORO NI TUHAN I DIBAGASAN HABADIAON*
Patujolo
Tingki marhobas di Kantor Pusat manang na piga hali manamuei pinompar ni Parbarita Nauli na ro sian luat Jerman. Adong doi anak ni missionaries adong muse doi nang pahompu (cucu) dohot nini manang nini (cicit). Nasida mangebati Tano Batak nang Kantor Pusat HKBP naeng marnida inganan panghobasion ni natoras manang ompungnasida. Adong doi na manungkun dia do huta manang huria inganan panghobasion ni natorasna manang ompungna, adong muse doi na ziarah songon na taboto torop do missionaris na monding di Tano Batak jala hinamborna oe di tano Batak. Sian angka tamue na ro adong muse doi na mamboan photo manang dokumentasi. Ro nasida naeng pasombu sihol dohot manghalashon ala marparbue do ulaon napinungka ni parbaritanauli i gabe jongjong jala mangerbang HKBP ndada holan di Tano Batak alai sahat do desa naualu jala sahat muse tu luar negeri. Sada las ni roha do tutu di ganup Parbarita Nauli molo marparbue pangulaonna gabe boi idaon ni angka sundut na mangihut.
Songon i do diturpuk on Apostel Paulus maradophon huria Tessalonika. Ai dung sahat Barita Nauli tu huria Tessalonika sai ditahi Paulus do ro mangebatinasida jala sai dihalungunhon ibana asa lam mangerbang huria Tessalonika songon sada huria na matoras. Ndada holani tahe sai tongtong diboan Apostel Paulus huria Tessalonika di tangiangna asa lam magodang, lam margogo jala lam marparbue haporseaon ni huria di na manomunomu haroro ni Kristus. Ido umbahen na didok ibana: 1 Tesalonik 3:10 (TOBA) Borngin dohot arian lobi sumurung do tangiangnami, asa anggiat idaonnami bohimuna laos patingkosonnami, ia adong dope hahurangan ni haporseaonmuna.
Adong na khusus panghasiholion ni Paulus maradophon huria Tessalonika ala adong sian huria i na sala mangantusi taringot tu haroro ni Kristus. Memang dijamitai angka Parbarita Nauli jonok do ari haroro Tuhan i, alanii ingkon dungo. Na ro do Tuhani songon panangko borngin ala ni ingkon tagam. Ala jonok do haroro ni Tuhan i gabe adong sian ruas ni huria naso mangula ai dirajumi nasida so adong be gunana mangula ai na ro ne ma Tuhan i. Na deba manggadisi artana ai so boanoni gabe paburnangburnang diri. Sandok gabe manirpang do nasida sian Poda na niajarhon ni Parbarita Nauli i di pangulaonnasida siganup ari. Ido umbahen na dipaingot ni Apostel Paulus di 2 Tesalonik 3:6 (TOBA) Alai mangasahon Goar ni Tuhanta Jesus kristus: Hupaingot hami ma hamu, ale angka dongan: Sumurut ma hamu sian ganup dongan, na so maradat di parange, na so mangihuthon poda na jinalona sian hami!
Ndang diihuthonnasida be pangajaran ni apostel i gabe mangihuthon angka parpoda haliluon na so turut tu Barita Nauli.
Laos ido na naeng guruhononta di turpuk jamita on, panghirimon ni halak Kristen manomunomu haroro ni Kristus naeng ma Tarida lam martambatamba angka nauli di saluhut panghobasionna? Manomunomu Tuhani ndada huria na pasif alai huria na proaktif manghobasi dohot mangaramoti ruas ni huria tagam di haroro ni Tuhan. Domu tu Minggu Advent on, dijou hita manomunomu haroro ni Tuhan.
*Parjolo, panghirimon asa lam mangerbang huriaNa.*
1 Tesalonik 3:9 (TOBA) Ai hamauliateon dia ma tarlehon hami tu Debata, balos ni saluhut halalas ni roha na huhilala hami di jolo ni Debatanami marningot hamu?
Dipabotohon Paulus do di turpuk on, sihol dohot lungun ni rohana asa lam mangerbang huria Tessalonika jala lam togu di haporseaon. Diboan ibana ditangiangna asa lam togu jala lam matoras huria i. Sikap ni Apostel Paulus on ma naeng tiruan di ganup pangula, mamparsitta asa lam mangerbang huria na hinobasan. Ganup jumpang Minggu Advent I, na ginoari minggu panomunomuon ni Kristus jala targoar taon baru parhuriaon, naeng ma imbaru panghirimonta asa lam magodang jala lam mangerbang huria i. Unang ma nian lam marmetmet, lam sumurut jala lam marniang alai lam martambatama di angka ulaonnna denggan. Tarbarita ma nian huria ala ni angka ulaon na denggan, unang tarbarita manang gabe viral ala ni parsualon ni huria na mangorui sangap.
Jadi ganup jumpang Minggu Advent adong ma evaluasi manang rujiruji di ruas nang pangula boha do huria i lam magodang do manang lam marpengpeng? Lam mangerbang do manang lam marherut. Sian rujiruji i tontuhononhon ma langka laho mangeahi na dumenggan.
Ido na parjolo sirenungkononhonta di Advent nanparjolo on. Songon panghasiholi ni Paulus maradophon Tessalonika, songoni ma ganup pangula pmanghalungunhon hamajuon ni huria asa lam mangerbang jala lam ganda parbue na denggan.
Tahirim jala tataomutomu ma hurian na lam tu majuna. Hamajuon i ndang ro sandiri, baliksa tahe boi do tartading hita ala ni pangontak ni jaman on na mubamuba. Dituntut do kreatifitas sian pangula dohot parhalado asa mamangke potensi SDM dht tehnologi na adong. Ganup ma pangula mamparsiajarisa jala memberdayahon ruas ni huria asa boi hita manghobasi huria i di era digital manang era Industri 4.0
*Paduahon, huria na manghirim di haroro ni Kristus tarida sian na lam martambatamba holong ni roha.*
Diayat 12 di turpuk on tung mansai gomos diondolhon Apostel Paulus, huria na managam di haroro ni Kristus ima huria na lam patar di holong ni roha. Huria na marAdvent ima huria na lam martambatamba di holong ni roha di punguan i nang maradophon saluhut halak. 1 Tesalonik 3:12 (TOBA) Alai digohi jala lam ditambai Tuhan i ma haholongon ni rohamuna sama hamu, nang tu saluhut, songon holong ni rohanami di hamu!
Isi ni Barita Nauli ima holong ni Debata tu portibion marhitehite Jesus Kristus. Sude pangajaran ni Tuhan Jesus marosihon holong, ndada holan manghaholongi Dongan gariada tahe manghaholongi musu. Diula jala dipataridahon Jesus doi di ngoluNa. Holong ni Kristus i dipataridahon marhite panghophoponNa dihau pinarsilang. Ditonahon jala dipatihi Tuhan Jesus do tu angka siseanNa asa mian dibagasan holong ni roha. Didok di Johannes 13:34 (TOBA) Patik na imbaru ma hulehon tu hamu: Naeng ma masihaholongan hamu; songon holong ni rohangku di hamu, naeng ma songon i dohot hamu masihaholongan.
On do tugas ni angka na porsea naung mananda Debata marhitehite Jesus Kristus ima ingkon mian di bagasan holong. 1 Johannes 4:7-8 (TOBA) (II.) Hamu angka haholongan, masihaholongan ma hita, ai sian Debata do haholongon i, jala ganup na marholong ni roha, i ma naung tubu sian Debata jala ditanda do Debata.
Halak na so marholong ni roha, i do na so tumanda Debata, ai haholongon do Debata.
Alanii maolo tadok hita porsea ingkon mian do dibagasan holong. Jala holong ni rohai unang lam sumurut alai lam martambatamba. Tamba ari na tabolus, tamba umur, lam martambatamba ma nang holong ni roha. Laos ido ditonahon tu hita hombar tu natarsurat di Pilippi 1:9 (TOBA) Jala on do hupangido, naeng ma lam sumurung holong ni rohamuna, marurat di parbinotoan dohot di nasa panimbangon partondion,
Molo tung adong ulaon na denggan tapatupa di huria, di keluarga dohot di parkarejoan paboa unang ma pintor tapangeahon alai lam paserephon roha ai godang dope angka baso taula. Halak na martambatamba di holong ni roha ima halak na manghilala sai hurang ne do pambahenanna. Di turpuk on mangidohon tu hita naeng lam tatambai holongtai tu joloan ni ari. Asa lam patar jala taripar holong ni Kristus i tu saluhut Halak marhitehite parbue ni holong ni rohanta.
*Patoluhon, huria na manghirim di haroro ni Tuhani Ima huria na mangaramoti habadiaon jala so hasurahan sahat tu haroro ni Kristus. *
Huria ima hatopan ni halak Kristen angka na Badia. Badia hita ndada ala ni parulaonta na ture naso mangalaosi patik ni Debata. Ai jotjot do talaosi patik ni Debata jala godang angka na hasalaan na taula di ngolu on.
Di Padan Narobi adong do na ginoari pelean hasadaan ni dosa (penghapusan dosa) ima marhite na mamelehon anak ni lombu. Imamat 4:14 (TB) "maka apabila dosa yang diperbuat mereka itu ketahuan, haruslah jemaah itu mempersembahkan seekor lembu jantan yang muda sebagai korban penghapus dosa. Lembu itu harus dibawa mereka ke depan Kemah Pertemuan."
Suang Songoni do tong molo malim mardosa pelehononna sada anak ni lombu naso marlindang bahen hasesaan ni dosana. Imamat 4:3 (TB) maka jikalau yang berbuat dosa itu imam yang diurapi, sehingga bangsanya turut bersalah, haruslah ia mempersembahkan kepada TUHAN karena dosa yang telah diperbuatnya itu, seekor lembu jantan muda yang tidak bercela sebagai korban penghapus dosa.
Pelean pardengganan bahen hasesaan ni dosai nunga digohi Kristus marhitehite hamamatenai. Ibana do Sintua ni Malim namasuk tu Bagas Nasun Badia mamboan pelean pardengganan hasesaan ni dosa jala Kristus sandiri do pelean pardengganan bahen tobus dihita. Sipatupaon sahali marhitehite hamamate Solhot haheheonna.
Heber 7:26 (TOBA) Ai sintua ni malim na songon i do tama di hita, na badia, na so marlaok, na so marlindang, na marbolat sian angka pardosa, naung gabe tumimbo sian angka banua ginjang i,
Antong angka na Porsea dibTuhan Jesus I'ma angka na pinarbadiaan ni Kristus. Nunga tajalo hasesaan ni dosa di na Porsea hita di Kristus. Ido na taingot jala na tajalo tingki manjalo parpadanan na badia: daging dohot mudar ni Kristus manesa dosanta. Marhite siani dohononta ma badia hita ndada ala ni pelean pardengganan na tapelehon tu Debata, jala ias hita sian dosanta ndada ala naso hasurahan pangalahonta. Alai badia hita ala na diparbadiai ni Kristus jala ias hita sian nasa dosa ala rade do Tuhan Jesus manesa nasa dosanta.
Nunga disesa Tuhantai sude dosanta, diburi hita sian nasa pangalaosionta marhitehite panghophopon ni Kristus di hau pinarsilang. Mudarna na durus ima manesa dosanta jala patoguhon rohanta manghaporseai ibana asa sahat hita tu hasonangan sisalelenglelengna.
Adong do tugas ni halak naung manjalo hasesaan ni dosa di turpuk on. Ima ganup na porsea manjaga habadiaonna, hadaulaton dohot parangena asa unang madabu tu ragamragam ni dosa. Hutia Ima parsaoran ni angka na badia na patoguhon roha managam sahat tu haroro ni Kristus.
1 Tesalonik 3:13 (TOBA) Laho patoguhon rohamuna, gabe so hasurahan marhabadiaon di jolo ni Debata Amanta, di na ro i Tuhanta Jesus rap dohot saluhut angka na badiana.
Panimpuli
Sian hatorangan na diginjang i, tapangke ma Minggu Advent na parjoloon, laho patoguhon panghirimonta manomunomu Tuhani. Tapangke ma nasa silehonlehon ni Debata tu hita asa lam mangerbang panghobasion ni huria maradophon ruasnya dohot na humaliang. Lam martambatamba ma holong ni roha di keluarga, di punguan Nang di masayarakat pe. Tarida ma psrulaon dihita angka parbue na denggan sian angka huria jala ganup Hita be tajamothon habadiaon. Asa maolo to Tuhani jumpangta hita dibagasan habadiaon jala so hasurahan. Dungi rap marolopolop Hita bahenon ni Tuhani di habangsaNa. Amen
Salam Advent
Pdt Nekson M Simanjuntak, MTh (Praeses HKBP Distrik XXVIII Deboskab)
Tidak ada komentar:
Posting Komentar