HARAJAON NASO TARHUTUR

Jalo Hamu ma Harajaon Naso Tarhutur

Jamita di ari Minggu sadarion 15 mar 2015 ima sian Heber 12,18-29 taringot tu haunduhon ni na porsea tu Jesus naung mangalehon HataNa dohot bagabagai tu na porsea asa hot na porsea di harajaon ni Debata, ima na ginoar di turpuk on: "Harajaon Naso Tarhutur."

Toho di thema minggu digoar do: Parhalado Halomoan; mardongan biar dohot hadaulaton.
Molo tajaha turpuk on sian bona ni Bindu 12 tontu lam tangkas ma botoonta ia turpuk on ima sipodaon sian panurat Heber siulaon ni angka na porsea dia nma siulaon nasida di na manghirim haluaon i. Domu tu topik ni minggu na mandok Parhalado Halomoan? Antong na gabe sungkunsungkun: aha do sipatupaon ni parhalado asa parhalado halomoan sasahalak di jolo ni Debata? Manang aha do siulaon ni na porsea i asa ruas halomoan ni Debata ibana?

Sian turpuk Heber 12 on adong tolu na boi putihanta asa halomoan ni Debata:

1. Marhadaulaton dibagasan roha biar mida Jahowa.
Sian ayat 18-21dipatorang do songon dia biar ni roha ni bangso Israel tingki manjalo Patik di dolok Sinai, angkahitir, godoron jala mabiar situtu nasida. Diparentahon si Musa do naso jadi nasida masuk tu ombun ni Debata, ala ro Debata dibagasan api na marnalanala dohot panghuling ni sarune na mansai gogo. Baliksa ingkon manguras nasida ai ndang talup nasida marnida jala pajumpang bohi dohot Debata (jaha 2 Musa 19). Manangnise na masuk tu ombun ni Debata ingkon mate ibana. Alai ndada dibagasan Api be ro Debata, alai dibagasan PatikNa, dibagasan hataNa dohot fi bagasan Jesus Kristsu naung gabe pangoloi di Debata. Songoni ma nian ganup na porsea di bagasan roha biar mida Debata ala na songkal jala na badia do Debata. Sotung adong na neang jala langgus pajumpang dohot Debata di bagas jorona manang di parmingguon pe. Ingkon badia jala hormat di ganup nasa parjumpangan dohot Debata. Ala ni i ganup ma hita mangarade diri, mambuka roha manjalo haroro ni Debata di angka parsaoran diparmingguan manang di partangianganta be. Sotung adong be na mangaleai bagas jorono, manang na mambaen hagunturon di nasa parmingguon, sotung ro rimas ni Debata. Ai songon api do Debata na mangarotonghon (ay 29).

2. Unang tulak Ibana
Asa halomoan ni Debata hita, sotung tulak Ibana naung mamboan hata hangoluan i tu hita, ima Jesus Kristus. Pasupasu dohot dame do na binoanna asa tarpasupasu jala mardame rohanta. Hasonanganta do na binoanna, nang pe asa jumpang hasonangan na manongtong i ingkon boluson do hasusaan di na manuhuk silang i. Sandok sotung adong na manukak Ibana di ngoluon, gariada tahe gabe pasidohot hita nian siboan Hata i asa lam torop halak na marhamubaon ni roha asa lam torop halak na taruli di dame dohot pasupasu na binoanna. Ro pe ibana, na mambuat hangalutonta do jala paampuhon hasonanagan. (Pat Mat 11:28)

3. Jalo ma Harajaon Naso Tarhutur
Dipaboa panurat Heber do nasa na adong di portibion ima na boi tarhutur do, ndang hot jala na boi do tarhutur, matapor jala gabur. Taida ma Raja Pharao na gogo di tingkina, dihutur si Musa do. Suang songoni Nebukadnezar raja ni halak Babel dihutur jala gabur do pola manjampal ubana songkn dorbia. Suang songoni si Herodes, holan tubu Raja na pinaboa ni angka pwrroha sian Purba,mpintor angkahitir. Antong ndang adong na hot na tau haposan ni jolma na manongtong di portibi on. Sude i na lao salpu do molo dung ro Ibana. Ido umbahen na didok hata ni Tuhan Jesus di markus 13:31 "salpu pe songot tano dohot laut dohot nasa isina, alai anggo hatangki tung na so ooo salpu".

Antong aha do na so tarhutur, ima: harajaon ni debata. Nungaa dipaojak Debata harajaonna di portibion marhitehite Jesus Kristus, mian ma hita disi sotung adong na mambuat tumpal i sian hita. Tajalo hataNa jala taulahon, ai ido gogo di na porsea asa hot di harajaon na so tarhutur i. Molo tung gale hita tarajumi, tongtong do ni donganan ni Tondi Parbadia do ganup na porsea asa manongtong panghirimonna."